Балаҕан ыйын 10 күнүгэр Нөөрүктээйи нэһилиэгин тумэлигэр «Нөөрүктээйилэр бойобуой суолларынан» истиэндэ арыллыыта буолан ааста.
Ону тэҥэ «Эдэр краевед» куруһуок оҕолоро СӨ Национальнай бибилэтиэкэтин архыыбыттан «Кыым», «Социалистическая Якутия» 1941-1949 сс. хаһыаттартан Саҥа олох», «Красная огородница», Пушкин, Ленин аатынан холкуостар сэрии кэмигэр үлэлэрин туһунан бэчээккэ тахсыбыт ыстатыйалары түмэн, бэчээттээн хомуурунньуктары таһаардылар.
Истиэндэни бырайыакпытын өйөөн, үбүлээн таһаартарбыт Нөөрүктээйи нэһилиэгин баһылыга Николай Федоров, бэтэрээннэр сэбиэттэрин салайааччыта Светлана Сивцева астылар.
В.Н.Оконешников аатынан Павловскай орто оскуолатын 10 кылааһын үөрэнээччитэ Толя Егоров буойуннарбыт сэриилэспит сирдэрин архыыпка олоҕуран тахсыбыт «Мэҥэ Хаҥалас оройуона Аҕа дойду Улуу сэриитин сылларыгар. 1941-1945 сс. Нөөрүктээйи нэһилиэгэ» кинигэттэн, ахтыылартан түмпүтэ каартаҕа киирдэ. 9 кылаас үөрэнээччитэ Даша Егорова «Нөөрүктээйилэр бойобуой суолларынан» истиэндэҕэ QR-куод оҥорбутун сырдатта.
7 кылаас үөрэнээччитэ Дархан Алексеенко буойуннар наҕараадаларын түмэн, хас биирдии уордьан, мэтээл устуоруйатын үөрэтэн «Кыайыы бэлиэлэрэ» альбом оҥорон бырайыагынан куонкурустарга кыттан ситиһиилэммитэ. Үлэтин түмүгэ «Хорсун быһыы умнуллубат» истиэндэҕэ киирбитин билиһиннэрдэ.
Төрөппүт, З.Я.Осипова аатынан «Мичээр» уһуйаан иитээччитэ Наталья Егорова
истиэндэ оҥоһуутугар күүс-көмө буолбута.
Павловскай орто оскуолатын үлэһитэ Павел Дмитриев түмэлбитин өйүүр, күүс-көмө буолар. Дьону түмэн таҥан, уотун тардан бэлэм оҥордо.
Бу күн мустубут сэрии сылын оҕолоро, бэтэрээннэрбит Кыайыыны уһансыбыт дьоммутун ахтан-санаан аастылар.
Наталья Максимова, И.П.Игнатьев-Кинигэ Уйбаан аатынан кыраайы үөрэтэр түмэл салайааччыта
