Ыам ыйын 8 күнүгэр күннээх Моорук нэҺилиэгэр Улуу Кыайыы 80 сылын бэлиэ тэрээҺинэ буолан ааста. НэҺилиэк олохтоохторо, ыалдьыттара оҕолуун-уруулуун, аҕа көлүөнэ дьоммут бука бары ыраас күннээх халлаан анныгар үөрэ — көтө Кыайыы параадын уруйдуу хаамтыбыт. Моорук нэҺилиэгиттэн уоттаах сэрии толоонугар 124 киһи барбыта, 68 саллаат этэҥҥэ эйэлээх олоххо эргиллэн дойдуларыгар кэлбиттэрэ, 52 буойун сырдык тыына сэрии хонуутугар охтубута, сураҕа суох сүппүтэ 4 саллаат дьылҕата күн бүгүн биллибэт. Бу кэлин архыып матырыйаалыгар олоҕуран, Моорукка төрөөбүт дьону эрэ ааҕан ыйыллар сыыппара буолар. Ытык бэлиэ күн саллааттарбыт, бэтэрээн эҺээлэрбит мэтириэттэрин өрө күөрэччи тутан, кинилэр биҺиги эйэлээх олохпут туҺугар олохторун толук ууран турууласпыт кыайыыларыгар махталбыт бэлиэтин биллэрэн санаан-ахтан аастыбыт. Моорук орто оскуолатын директора Людмила Апросимова бу күн бэлиэ тэрээһинигэр мустубут дьоммутугар эҕэрдэ тыл этэн, Кыайыыны уһансыбыт саллааттарбытын өрүү саныыр, ытыктыыр, үүнэр көлүөнэ ыччаппытыгар, оҕолорбутугар хайаан да хас биирдии бэтэрээни ааттарын ааттаан сиэн оҕолорго тириэрдэр, кэпсиир, сырдатар биҺиги ытык иэспит буоларын бигэргэтэн эттэ.
Бэтэрээннэрбит сөҕүрүйбэт, кыайыыга дьулуурдаах хорсун- хоодуот санаалаах, инникигэ эрэл кыыма мичээрдээх мэтириэттэрин бар дьоммут олохтоохтор көрүүлэригэр К.К. Байкалов аатынан түмэл фото быыстапка оҥорон тэрээҺини ситэрдэ. Олохтоох дьаҺалта үлэҺит уолаттара уулуссабытын бэтэрээннэрбит мэтириэттэринэн планшеттары остоолбоҕо иилэн киэргэтии оҥордо. Бүгүҥҥү тэрээҺин олус сэргэхтик, дьон сүргэтэ өрө көтөҕүллэн көрсүҺүү үөрүүтүттэн астынан бэйэ бэйэни эҕэрдэлэһэн, ыллаан-туойан, эҕэрдэ кэнсиэр көрөн, сылаас үүттээх чээй иҺэн, ирэ- хоро сэһэргэһэн, хаартыскаҕа түһэн бэлиэтик түмүктэннэ диэн аҕа көлүөнэ дьоммут махтал тылларын эттилэр. Киэһэ оҕолуун, ыччаттардыын Кыайыы монуменыгар мустан өйдөбүнньүк, ытыктабыл бэлиэтэ чүмэчи ууран, эйэ холуубун күөрэччи уунан дойдубут үрдүгэр өрүү ыраас халлаан, эйэлээх олох туругурдун диэн алгыс тыллаах, кыайыы көтөллөөх буоллун диэн баҕа санаа этиилээх түмүктэннэ.
Александра Уваровская. Моорук.
«Айхаллыыбын сахам дьонун»
Айхаллыыбын сахам дьонун,
Куустээх, эрэллээх кыахтарын.
Улуу кыргыһыы кэмигэр
Кыайыыны уһансыбыттарын.
Айхаллыыбын сахам дьонун,
Сүппэтэх, дьулуурдаах санааларын.
Боростуой дьону, булчуттары,
Албан ааттаах ыччаттарын.
Айхаллыыбын сахам дьонун,
Кырдьык, дьиҥ санааларынан
Торуттэрин олохторун туһугар
Сэриигэ охтубут буойуттары.
Айхаллыыбын сахам дьонун,
Сахам норуотун ааттатан,
Саха сирэ-ытык сирбит
Ыраас халлаан анныгар олороругар.
Павлова Галя, 10 кылаас үөрэнээччитэ
«Умнумаҥ»
Мин өйдөөн кэлэбин куруутун
Оҕо саас чаҕылхай сылларын.
Ол эрэн ыар-нүҺэр күннэри,
Күлүктүүр ыарахан кэмнэри.
Ол Кыайыы күнүгэр анаммыт
Үөрүүлээх парадка түмсүүнү.
Сүрэхтэн этиллэр өйдөбүл,
Аймалҕан аргыстаах ахтыыны.
Ыал аайы өлүүнү аҕалбыт
Ыар тыыннаах өйдөбүл күлүгэ.
АҺаҕас баастарын хахтара
Оспотох ыарыытын аахтара.
Абаҕам соҕотох уоллааҕа,
Сураҕа суох сүппүт «суруга»
Кырдьаҕас хомуньуус сүрэҕэр
Кутурҕан, хомолто буолара.
Кыайыыны аҕалбыт саллааттар,
Хотуулаах үлэлээх холкуостар,
Биир ньыгыл кэккэҕэ тураллар,
БиҺириир дьоннорбут буолаллар.
Кэнэҕэс кэнчээри ыччаттар,
Кэскилгит туҺугар «күн буолбут»,
Кэм -кэрдии кэрэҺит өбүгэҥ,
Кэмнэммэт кыайыытын киэн туттун.
Матрена Гаврильевна Егорова педагогическай үлэ бэтэрээнэ.
