Биллиилээх мелодист, ырыаһыт Валерий Власьевич Ноев төрөөбүтэ 85 сылыгар
Бүгүн, сэтинньи 20 күнүгэр, саха норуотугар кылгас олоҕор үтүмэн баай ис хоһоонноох, киэҥ ыырдаах ырыалары суруйан хаалларбыт мелодист, ырыаһыт Валерий Ноев төрөөбүтэ 85 сылын туолла.
Д.Ф.Ходулов аатынан Майатааҕы Култуура киинигэр кини талааныгар сүгүрүйэр бар дьоно сэргэх кэриэстээн, аатын-суолун үйэтитэн улахан кэнсиэри туруордулар. Иккис төрөөбүт дойду оҥостубут Мэҥэ Хаҥалас сиригэр-уотугар Валерий Ноев үгүс ырыаларын суруйбута, Баатара, Бэдьимэ, Майа дьонун кытта алтыһан үлэлээбитэ-хамсаабыта. Оройуон култууратын, ырыатын-тойугун сайыннарыыга, байаанынан доҕуһуоллааһыны сайыннарбыта, ансаамбыллары, хуору тэрийии курдук уустук эйгэҕэ далааһыннаахтык ылсыбыта. Биэс сыллааҕыта чугас дьоно, кыыстаах уола, аймахтара түмсэннэр бөдөҥ кинигэни таһаартарбыттара.
Бүгүҥҥү уус-уран кэнсиэри Валерий Ноев аатын үйэтитиигэ уонунан сылларга үлэлэһэр Дмитрий Санников иилээн-саҕалаан ыытта. Валерий Власьевич олоҕуттан ахтан-санаан ааста, ырыаларын суруллубут устуоруйатын сырдатта. Кэнсиэргэ кини биллэр-көстөр уонна урукку кэмҥэ умнулла быһыытыйбыт сорох ырыаларын бар дьонугар бэлэмнээн туруорда. Үөһэттэн кутулла турар, санааны үөрдэр, баай матыыптардаах ырыалары бииртэн биир уус-уран самодеятельность кыттыылаахтара үрдүк көтөҕүллүүлээхтик толордулар. Кэнсиэр М.К.Попова аатынан оҕо ускуустубатын оскуолатын норуодунай оркестрын толоруутунан саҕаламмыта бар дьону үөртэ. «Кыталык», Төхтүртэн «Манчаары», Аллараа Бэстээхтэн «Ай-Тыын» үҥкүү ансаамбыллара, Чүүйэттэн «Мичээрдэр», Бэдьимэттэн «Сырдык сүүрээн», Аллараа Бэстээхтэн «Талба», Майаттан «Аарык», «Сандаара», «Айыына» ырыа ансаамбыллара, улуустааҕы мелодистар, байаньыыстар, хоһоонньуттар түмсүүлэрэ, биирдиилээн толорооччулартан Арылхан Касьянов, Ульяна Ефремова, Петр Сергучев, Михаил Санников, Степан Копырин, Спиридон Григорьев, Надежда Захарова уонна Төхтүр, Аллараа Бэстээх, Нөөрүктээйи, Хаптаҕай, Майа холбоһуктаах хуордара кыттыыны ыллылар.
Бу күн норуот таптыыр ырыаһыта Валерий Ноев чахчы да кинини ахтар-саныыр, үйэтитэр дьоннооҕун-сэргэлээҕин, бар дьонугар умнуллубат аналлааҕын итэҕэттэ.
Марфа Птицына.
