От ыйын 5 күнүгэр Чыамайыкы нэһилиэгэр оҕо сайыҥҥы сынньалаҥын туһалаахтык атаарарыгар, күөгүгэ интэриэhи тардар сыаллаах оскуола, уһуйаан үлэһиттэрэ күөгүһүттэр күрэхтэһиилэрин тэрийэн ыыттылар. «Эр Хоһуун» бырайыак чэрчитинэн бастакытын ыытылынна. Онно уhуйаан уонна оскуола оҕолоро 14 буолан кытыннылар.
«Бастыҥ күөгүһүт» күрэхтэһии кыайыылаахтарынан уhуйаан иитиллээччитэ Айсен Дьячковскай, алын кылаас үөрэнээччитэ Вася Федоров, орто сүһүөхтэн Сулусчаана Платонова буоллулар.
Анал аат кыайыылаахтарынан ааттаннылар: «Бастакы балык» ‒ Айсен Дьячковскай (уһуйаан), «Улахан мунду» ‒ Вася Федоров (алын кылаас), «Кырачаан балыксыт» ‒ Сандаара Иванова (уhуйаан), «Бэһиэлэй балыксыт» ‒ Алеша Федоров (уhуйаан), «Бастыҥ көмөлөһөөччү» ‒ Ариян Прокопьев (алын кылаас).
Бастакы балыгы хаптарбыт, быйыл маҥнайгы кылааска киириэхтээх Айсен Дьячковскай санаатын маннык үллэстэр: «Мин бүгүн 9 балыгы хаптардым. Күөгүлүүрбүн олус сөбүлүүбүн. Маннык күрэхтэһиилэр өссө буолуохтарын баҕарабын». Оҕолор көхтөөхтүк кыттан, балыктаан сэргэхсийдилэр. Бары Туоһу суруктары туттулар. Кыайыылаахтар грамотанан уонна бэлэҕинэн наҕараадаланнылар. Хаптарбыт балыктарын барытын дьиэлэригэр илдьэ бардылар.
Ангелена Федорова, 8 кылаас, «Проба пера» эдэр кэрэспэдьиэнэ, Чыамайыкы
