«Үлэ киһини киэргэтэр» диэн саха өс хоһоонугар этиллэринии тыа сирин эдэр ыччата үлэ суох диэн быар куустан олорбокко, талба талааннарынан, ураты дьоҕурдарынан тус суолларын тобулаллара хайҕаллаах көстүү буолар.
Павловскай сэлиэнньэтин олохтооҕо, эдэр ийэ Наина Цыпандина бэйэ дьарыктаах буолуутугар сурутан иистэнэн, ас астаан дьиэ кэргэнигэр эбии дохуот киллэрэр. Дьон-сэргэ талааннаах тарбахтаах Наина сахалыы моһуоннаах ураты бэргэһэлэрин, баайыы оҥоһуктарын сэҥээрэн хамаҕатык сакаастыыллар. Түргэн-тарҕан туттунуулаах асчыт бэрдэ бэлиэ күннэргэ минньигэс туортары, бурдук астары буһаран ыал үөрүүлээх түгэннэрин киэргэтэр. Эдэр ийэ туһалаах дьарыгын туһунан санаатын бу курдук үллэстэр:
‒ Ураты кэрэ айылҕалаах, үтүө-мааны дьонноох Нөөрүктээйи нэһилиэгэр төрөөбүтүм. Ыал буолан, оҕо-уруу төрөтөн төрүт түөлбэбэр олохсуйарга санаммытым. Буҕаалтар идэлээхпин. Дьиэ кэргэммин көрөн-истэн дьиэҕэ олорор кэммэр сөбүлүүр дьарыкпынан дохуот киллэриниэхпин баҕарбытым. Оҕо эрдэхпиттэн баайарбын, иистэнэрбин олус сөбүлүүбүн. Инньэ гынан, сакааһынан аныгылыы быһыылаах бэргэһэлэри баайарга санаммытым. Кэрэ аҥаардар нуорка түүтүттэн оҥоһуллубут сабынан баайыллыбыт бэргэһэлэри олус сэҥээрэн сакаастаабыттара. Кыһынын кэтэргэ сылаас буоллун диэн биэтэстээн тикпиппин сөбүлээбиттэрэ. Устунан интэриэһиргээн сахалыы дьабакаҕа майгынныыр бэргэһэлэри тикпитим. Аныгылыы моһуоннаан оҕуруолаах быалаабытым. Атыыбын-тутуубун куйаар ситимигэр хаартыскалаан укпутум. Нэһилиэгим олохтоохторун таһынан атын бөһүөлэктэн, улуустартан сакаас киирбитигэр олус үөрбүтүм. Бу үлэм быыһыгар интэриниэттэн көрөн туорт буһарарга үөрэммитим. Дьон бүттүүн сөбүлүүр «Кыһыл баархат», «Сакалааттаах», «Мүөттээх», «Ретро» туортары астыыбын. Оҕолор төрөөбүт күннэригэр мультик дьоруойдарын ойуутун түһэрэбин. Үбүлүөйдэргэ дьэрэкээн өҥнөөх кириэминэн сибэкки оҥорон симиибин. Ыраас салгыннаах, үтүө, сэмэй дьонноох тыа сиригэр олохсуйан, оҕону тус холобурбутунан үлэҕэ сыһыаран иитэн норуоппут кэскилин түстүүбүт. Эдэр ыччат үлэ суох диэн санаарҕаан олорбокко тугу сатыырбытынан дохуот киллэринэрбит сөптөөх суол диэн сыаналыыбын. Аныгы үйэҕэ ыал ийэтэ оҕолорун аһатарга, таҥыннарарга кэргэнигэр күүс-көмө буолан дьиэ кэргэнин тирэхтиир.
Бу курдук, ыччат дьон сатабылларын сайыннаран тыа сиригэр олорорго, кэнчээри ыччаты сахалыы эйгэҕэ иитэргэ дьулуһаллара Сахабыт сирин сарсыҥҥытыгар эрэли үөскэтэр.
Изабелла Романова
