Үлэ – оҕо эт-хаан, өй-санаа өттүнэн сайдарыгар төһүү күүһүнэн буолар.
Мэҥэ Хаҥалас улууһун баһылыга Дмитрий Тихонов оҕону олоххо бэлэмнээх буоларыгар туһаайан, саха төрүт үгэстэригэр олоҕуран, тыа хаһаайыстыбатыгар сыһыаран, үлэнэн-хамнаһынан иитэргэ сыал-сорук туруорар. Бу чэрчитинэн, Социалистическай Үлэ Дьоруойа Т.Г. Десяткин аатынан Тумул орто оскуолата уонна “Тумул” ТХПК дуогабардаһан, үөрэнээччи сайыҥҥы сынньалаҥын көдьүүстээхтик атаарарыгар “Эрчим” үлэ-сынньалаҥ лааҕырын үлэлэппиттэрэ иккис сылыгар барда. Оскуола кэлэктиибэ “Тумул” кэпэрэтиип мөлтөх туруктаах, эргэ күрүөлээх бурдук бааһыналарын көрө сылдьан уочаратынан өрөмүөннүүр, саҥардар үлэни ыытар. Быйылгы сезоҥҥа икки лааҕырынан 30 оҕо үлэнэн хабылынна.
“Эрчим” үлэ уонна сынньалаҥ лааҕырыгар бэс ыйын 8 күнүттэн саҕалаан 21 күнүгэр диэри начаалынньыгынан физкултуура учуутала Петр Федорович Попов, иитээччилэринэн оскуола дириэктэрэ Владислав Николаевич Кисиляхов уонна дириэктэри үөрэх чааһыгар солбуйааччы Парасковья Никифоровна Эверстова үлэлээтилэр. Дириэктэр Владислав Николаевич оҕолору сахалыы тыыҥҥа иитэр хайысхалаах үлэни ыытар. Бу иитинэн дириэктэри иитэр үлэҕэ солбуйааччы Парасковья Егоровна Лебедева туойунан сахалыы иһиттэри оҥорууга “Туой” лааҕыры үлэлэттэ. Манна учуутал биэс оҕону бэйэтин маастарыстыбатыгар уһуйда. “Туойдар” оскуолаҕа баазаланан, Парасковья Егоровна мастарыскыайыгар дьарыктаннылар.
Улуус үөрэҕириитин салалтата, начаалынньык Ирина Плотникова лааҕыры аһынан-үөлүнэн уонна Таисия Васильевна этинэн хааччыйбыттара. Асчытынан Клавдия Владимировна Ноговицына үлэлээн, оҕолору күҥҥэ үстэ итии, тотоойу, минньигэс аһынан хатаҕалаан аһатта.
Калинин бааһынатыгар 2 аҥар килэмиэтир усталаах саҥа күрүөнү тутарга лааҕыр оҕолоро тыһыынчанан остоолбо маһын хатырыктаатылар, сүгэнэн, күрдьэҕинэн тутта үөрэннилэр. Саамай кыралара 7-с кылааһы бүтэрбит Родион Семенов дьиэтиттэн аҕата оҥорбут мас хатырыктыырга аналлаах тэрилин аҕалан тутунна. Оҕолор лааҕыр салайааччыларыттан үлэ үөрүйэхтэригэр, сатабылга уһуйулуннулар. Бу күүстээх үлэни сынньалаҥы кытта тэҥҥэ дьүөрэлээн, викториналарга, куонкурустарга кытыннылар, успуорт көрүҥнэригэр күрэхтэстилэр. Лааҕыр сэргэх олоҕуттан дуоһуйаннар, оҕолор икки нэдиэлэ кэми билбэккэ хааллылар. Сайылыктарга олорор оҕолор төрөппүттэригэр көмөлөстүлэр.
“Тумул” кэпэрэтиип бэрэссэдээтэлэ Таисия Десяткина лааҕыр сабыллыытыгар оҕолорго хамнастарын уу харчынан үөрдэ-көтүтэ туттаран, оҕолор, төрөппүттэр махталларын ылла. Бу курдук, икки өттүттэн туһалаах үлэ-хамнас тэриллэн, “Тумул” кэпэрэтиип бурдук бааһыналарын эргэ күрүөлэрэ саҥардыллаллар, үөрэнээччилэр сайыҥҥы сынньалаҥнарын көдьүүстээхтик атаараллар.
Марелла Баишева.
