Кулун тутар 30 – муус устар 1 күннэригэр А.Г. уонна Н.К.Чиряевтар ааттарынан Дьокуускайдааҕы национальнай гимназияҕа оскуола үөрэнээччилэригэр ХХ өрөспүүбүлүкэтээҕи «Эдэр дипломат-2026» диэн киэҥ хайысхалаах үбүлүөйдээх куонкурус буолан ааста.
Үүнэр көлүөнэ Ийэ дойдуга бэриниилээх, көхтөөх гражданскай көрүүлээх, Ийэ дойдубут Арассыыйа уонна тас дойдулар ыытар бэлиитикэлэрин анаарар буолалларыгар туһуланар күрэс түмүктүүр түһүмэҕэр өрөспүүбүлүкэ бары муннуктарыттан муниципальнай күрэс кыайыылаахтара, уопсайа 54 оҕо кыттыыны ылла.
Манна улуус иһинэн ыытыллыбыт сүүмэрдиир түһүмэҕи ситиһиилээхтик туораан Мэҥэ Хаҥалас чиэһин дьоһуннаахтык көмүскээтилэр: Кирилл Жирков (В.П.Ларионов аатынан Майа орто оскуолата, салайааччы М.А.Самсонов), Мусьяна Попова, Ян Киренскэй (И.Г.Тимофеев аатынан Майатааҕы лиссиэй, салайааччы А.А.Гурьева), Давид Романов (В.В.Скрябин аатынан Чүүйэ орто оскуолата, салайааччылар Л.Н.Илларионова, Нь.А.Местников).
Куонкурс чыпчаал кыайыылааҕынан Сунтаардааҕы политехническай интэринээт-оскуола 11 кылааһын үөрэнээччитэ Федот Алексеев буолла. Киниэхэ Москватааҕы Норуоттар икки ардыларынааҕы сыһыаннаһыы судаарыстыбаннай институтугар киирэргэ мэктиэ сурук туттарыллынна. Үрдүкү кылаас оҕолорун лиигэтигэр үс бастыҥ иһигэр киирдилэр: 1 үрдэл – Артем Иванов (В.П.Артамонов аатынан Хамаҕаттатааҕы саха-французскай лиссиэй, Нам улууһа); 2 үрдэл – Александр Васильев (өрөспүүбүлүкэтээҕи лиссиэй-интэринээт); 3 үрдэл – Айсен Стручков (Мииринэй орто оскуолата, Мииринэй куорат). Алын кылаас оҕолорун лиигэтигэр: 1 үрдэл – Савелий Желомкин (Дьокуускайдааҕы классическай гимназия); 2 үрдэл Макар Нашко (Ленскэй куорат №2 оскуолата); 3 үрдэл – Сергей Третьяков (Налимскай орто оскуолата, Орто Халыма оройуона).
Кыттааччылар дебаат (мөккүөр), омук тылын билии, араатар күрэҕэ курдук кэккэ тыҥааһыннаах тургутуулары аастылар. Эдэр инникилээх дипломаттар история, быраап, экономика эйгэлэригэр чиҥ билиилэрин көрдөрдүлэр, дипломат уһулуччулаах, судургута суох хаачыстыбаларыгар боруобаланнылар, бустулар-хаттылар.
Тэрээһин бырагырааматынан финалистар «Патриот» ыччат киинигэр, «Арассыыйа – мин устуоруйам» пааркаҕа, түмэллэргэ сылдьан элбэҕи биллилэр-көрдүлэр. Биир саамай интэриэһинэй түгэнинэн Дьокуускай куорат мэриятыгар экскурсиялара буолла. Манна оҕолор куорат баһылыгын Евгений Николаевич Григорьевы кытта ирэ-хоро сэһэргэстилэр, интэриэһиргиир ыйытыыларын биэрдилэр, өйдөбүнньүк хаартыскаҕа түстүлэр.
Оҕолорбут маннык үрдүк суолталаах, киэҥ далааһыннаах тэрээһиҥҥэ кыттан элбэҕи билэн, үүнэргэ-сайдарга кыах, күүс, уопут ылан кэлбиттэригэр күрэс тэрийээччилэригэр махтанабыт.
Любовь Илларионова,
В.В.Скрябин аатынан Чүүйэ орто оскуолатын учуутала.
