Бука барыгытын Сомоҕолоһуу Күнүнэн итиитик-истиҥник эҕэрдэлиибин!
«Норуот күүһэ ‒ көмүөл күүһэ» диэн бэргэн этии бу күн ис хоһоонун, суолтатын толору арыйар. Ханнык да уустук кэмнэргэ дьиэ кэргэнтэн саҕалаан түөлбэ, уопсастыба, норуот биир санааны ылыннаҕына тугу барытын тулуйар уонна кыайар. Ол туоһутунан, улууспутугар элбэх омук бииргэ олорор, үлэлиир, айар-тутар усулуобуйата толору баар. Биһиги иннибитигэр турар соруктарбыт кэскиллээхтэр уонна олоххо киирэн иһэллэр: Өлүөнэ Эбэни туоруур муоста тутуутун кытта инники сайдыыбыт ыкса ситимнээх, улууспут кииннэрэ Аллараа Бэстээх уонна Майа салгыы тупсан, кэҥээн иһиилэрэ, нэһилиэктэргэ гаас ситимин тиэрдии, суоллары оҥоруу, социальнай хайысхалаах эбийиэктэри тутуу, хаарбах дьиэттэн дьону көһөрүү о.д.а. Байыаннай дьайыы буола турар кэмигэр, Кыайыыны чугаһатан, бүттүүн улууһунан, ким да туора турбакка, көмөлөһө олорорбут ‒ бу сомоҕолоһуу, биир санааланыы чаҕылхай туоһута. Тыа сирэ чөл олорорун, тыа хаһаайыстыбата эрэллээх илиигэ хааларын туһугар ыччаппытын күннэтэ биир санааланыы, сомоҕолоһуу тыыныгар, үлэҕэ ииттэхпитинэ эрэ үтүө түмүктэри көрүөхпүт. Олохпут араас уустук, быһаарыылаах кэрдиис кэмнэригэр кэннилэринэн тэскилээбэтэх, күүстээх санаанан салайтаран үлэлээбит-хамнаабыт, турууласпыт, норуоту биир сыалга түмпүт биир дойдулаахтарбытын ытыгылаан, бүгүн ахтан-санаан ааһар тоҕоостоох. Түмсүү, сомоҕолоһуу кынаттанан иннибит диэки эрэллээхтик хардыылаан иһиэҕиҥ!
Истиҥ эҕэрдэни кытта, норуот дьокутаата Андрей Находкин.