Эһигини «Мэҥэ Хаҥалас улууһа» муниципальнай оройуон дьаһалтатын, улуус дьокутааттарын Сэбиэтин ааттарыттан Саха Өрөспүүбүлүкэтин Судаарыстыбаннаһын күнүнэн эҕэрдэлиибит!
33 сыл анараа өттүгэр 1990 сыл балаҕан ыйын 27 күнүгэр ылыныллыбыт Саха сирин судаарыстыбаннай суверенитетын туһунан декларация – өрөспүүбүлүкэ федерация субъегын, Улуу Арассыыйа быстыспат сорҕотун быһыытынан сайдыытын биир сүрүн кэрдиис кэмин туоһулуур устуоруйа докумуона буолар.
Биһиги дойдубут бэлитиичэскэй уонна экэнэмиичэскэй тутула уларыйар сүҥкэн суолталаах сылларыгар бу докумуон оччотооҕу тирээн турар кэм ирдэбилэ этэ, Саха сирин хас биирдии олохтооҕун дьылҕатын быһаарар суолталаммыта.
Бу бэлиэ күн Сахабыт сирин уратытын, Өрөспүүбүлүкэбит чулуу бэрэстэбиитэллэрэ ситиһэн, туруорсан кэлбит ыра санааларын түмэр, биһигини, аныгы көлүөнэ дьону, сайдар кэскилбит бэйэбититтэн тутулуктаах буоларын туоһулуур дириҥ ис хоһоонноох, суолталаах күн буолар.
Бу дьаһал олоххо киирэн, Сахабыт сирин инники дьылҕата саҥалыы салаллан, олохпут сайдыытын далааһына кэҥээн биэрбитэ. Төрөөбүт дойдубут бэйэтин социальнай-экэнэмиичэскэй сайдыытын, нэһилиэнньэ олоҕун-дьаһаҕын тупсарыы сүрүн хайысхаларын быһаарынар, туруорсар, сайыннарар кыахтааҕын уонна бырааптааҕын чопчулуур улахан суолталаах Конституция төрүттэммитэ.
Саха автономиятын төрүттээбит Максим Аммосов, Былатыан Ойуунускай, Исидор Бараахап уонна да атын чулуу дьоммут түстээбит ураты сыаннастарын чөл хаалларарга уонна элбэтэргэ төһүү күүс буолбут Өрөспүүбүлүкэ оччотооҕу салалтатыгар уонна уопсастыбаннаһыгар соҕотох сөптөөх суолу талбыттарын бэлиэтээн туран кинилэргэ дириҥ ытыктабылбытын биллэрэбит. Хотугу дойду инники дьылҕатын быһаарбыт дьаһаллар кэмигэр уонна сөпкө ылыныллыбыттарын кэм-кэрдии дьэҥкэтик көрдөрдө.
Билигин үтүө үгэстэрбитин өрө тутан, биһиги саҥа сыаллары туруорунабыт. Соруктарбытын ситиһэргэ, олохпут таһымын үрдэтэргэ үлэ бары эйгэтигэр күүспүтүн түмэммит, түмсүүлээхтик хорутаммыт Сахабыт сирэ инники кирбиигэ тахсар олугун түстэһэ, Судаарыстыбаннаһа бөҕөргүүрүгэр кылааппытын киллэрэ туруохпут диэн эрэнэбит.
Күндү биир дойдулаахтарбыт! Бу бэлиэ күҥҥэ чэгиэн туругу, этэҥҥэ буолууну, уҕараабат эрчими, инникигэ эрэли, байылыат олоҕу, таһаарыылаах үлэни баҕарабыт!
Эҕэрдэни кытта улуус баһылыга Дмитрий ТИХОНОВ,
оройуон дьокутааттарын Сэбиэтин бэрэссэдээтэлэ Иннокентий АНДРОСОВ