Улууспутугар үөрэхтээһин 150 сылын сабыллыытыгар аналлаах араас тэрээһиннэр ыытылыннылар.
Хорообуттааҕы мэтэдиичэскэй холбоһук оскуолалара Баатараттан, Бэдьимэттэн, Хорообуттан 51 бэтэрээн учуутал үөрүүлээх күҥҥэ муһуннулар.
Ыалдьыттарбытын алгыстаах алаадьынан көрсөн оскуолаҕа экскурсиялатан, мусуойга оскуола устуоруйатын үөрэнээччилэр билиһиннэрдилэр. Сорохтор Хорообут оскуолатыгар үөрэммит хаартыскаларын көрөн, ол кэмнэри санаан истиҥник кэпсэттилэр, хаартыскаҕа түстүлэр.
Хаартыскаҕа түһэллэригэр анал муннуктары актыып оҕолоро оҥорбуттара, учууталлар үлэлээбит сылларын туһунан интервью биэрдилэр.
Кырдьаҕас учууталлар сандалы тула төгүрүччү олорон ирэ-хоро кэпсэттилэр.
Тэрээһини кэлбит оскуола боропсойуустара бииргэ сүбэнэн тэрийдилэр. Биэчэри Хорообут боропсойууһун бэрэссэдээтэлэ Марфа Андреева иилээн-саҕалаан ыытта. Оҕолор учууталга махтал тыллары хоһоонунан тиэртилэр. Оскуола дириэктэрдэрэ өйдөбүнньук бэлиэлэри, улуустааҕы уерэх салалтатын аатыттан Эҕэрдэ суруктары, бэлэхтэри, сибэкки дьөрбөтүн туттардылар. Аҕа саастаах дьоммутугар сүгүрүйэн туран, оскуола үлэһиттэрин ансаамбыла эҕэрдэлээтилэр. Көрдөөх оонньуулары оонньоон, оҕо саастарын санаатылар, ырыа арааһа ылланна, эҕэрдэ эриэккэһэ этилиннэ.
Түмүукэ оскуолабыт үлэһитэ Юлия Егорова минньигэс туордунан кундулээн, үөрэн-көтөн тарҕастылар.
Октябрина Васильева. Хорообут орто оскуолата
