Эһигини барыгытын айгыр силик айылҕабыт солко күөҕүнэн симэммит үтүө кэмнэрэ үүммүттэринэн, өбүгэлэрбититтэн ыла төрүттэммит үтүө үгэспитинэн, Үрдүк Айыыларбытыттан алгыс ылынар Үрүҥ Тунах Ыһыахтар күннэрэ тосхойбуттарынан Мэҥэ Хаҥалас улууһун салалтатын, уопсастыбаннаһын уонна тус бэйэм ааппыттан итиитик-истиҥник эҕэрдэлиибин!
Бу күн бүттүүн саха норуота сыспай сиэллээхпит, хороҕор муостаахпыт этэҥҥэ күөххэ үктэммитинэн, самаан сайыны көрсүбүппүтүнэн, өлгөм үүнүүлээх өҥ-быйаҥ сайын, сарсыҥҥы күммүт эркээйилээх, этэҥҥэ буоларын туһугар Үрдүк Айыыларбытыттан сүгүрүйэн, алгыстаах алаадьынан, кыынньар кымыһынан айах тутан көрдөһөбүт!
Дойдуга Уһуйааччы уонна настаабынньык, өрүспүүбүлүкэбитигэр Үлэ уонна физкультурнай хамсааһын 100, биһиги улууска Тыа хаһаайыстыбатын сылларыгар аналлаах үтүө үлэһит дьону уруйдуур Үрүҥ Тунах Ыһыахпыт төрөөбүт сирбит сайдар кэскилигэр олук уурдун, сомоҕолоһууну күүһүртүн! Инникитин даҕаны түөлбэбит, улууспут сайдыытыгар түмсүүлээхтик үлэлиэҕиҥ, айыаҕыҥ-тутуоҕуҥ, ситиһиилээх буолуоҕуҥ!
Хас биирдии дьиэ кэргэҥҥэ чэгиэн-чэбдик туругу, этэҥҥэ буолууну, эйэлээх халлааны, дьолу баҕарабын! Сир-ийэ силигилии тыллар салгына уҕараабат эрчими эптин, ыраас санааны сахтын, эти-сиини угуттаатын!
Ил-эйэ эҥэрдэстин! Дьол-соргу тосхойдун!
Ытыктабылы кытта,
улуус баһылыга Дмитрий Тихонов