2025 сылга дойду үрдүнэн Улуу Кыайыы 80 сыла бэлиэтэниэҕэ. Бу дьоһун үбүлүөйдээх сылы көрсө улууспут “Эркээйи” хаһыатыгар сурутан ааҕаргытыгар ыҥырабыт.
“Эркээйи” хаһыаты эрэдээксийэттэн ылыыга уонна электроннай аадырыска сурутуу сылы эргиччи барар. Маны сэргэ, “Улус Медиа” сайтаахпыт, @gazetaerkeii телеграм ханааллаахпыт.
Билигин социальнай ситимнэринэн араас таһаарыы элбээбит кэмигэр кумааҕы хаһыаппытыгар сурутууну көҕүлээччилэрдээх итиэннэ өйөөччүлэрдээх буоламмыт, хаһыаппыт тахсар ахсаана аҕыйаабакка иһэр. Түгэнинэн туһанан, тыа сирин түөлбэтин дьаһалталара нэһилиэктэригэр олорор тыыл бэтэрээннэригэр сыллата сурутуу бэлэхтиир үтүө үгэстэрэ олохтонон, биһиги аҕам саастаах көлүөнэбит улууһун хаһыатын ааҕа олороругар олохтоох дьаһалталарга барҕа махталбытын тиэрдэбит.
2025 сылы көрсө «Бэтэрээҥҥэ суруттар» аахсыйабыт салҕанар. Манна ким баҕарар улууһун хаһыатын сурутан аҕам саастаах дьоммутугар, биир дойдулаахтарбытыгар, үлэ, тыыл бэтэрээннэригэр, ону тэҥэ, анал байыаннай дьайыы кыттыылаахтарын дьиэ кэргэннэригэр хаһыаты сурутан бэлэхтиэн сөп.
Сылата ыытыллар аахсыйаҕа куруутун кыттар, өйүүр успуонсардарбытыгар истиҥ махталбытын биллэрэбит. Ил Түмэн дьокутаата Андрей Находкин, урбаанньыт Руслан Федотов сыллата 10-нуу үлэ бэтэрээнигэр сыллааҕы сурутууну бэлэхтээн кэллилэр. Бу сылга Ил Түмэн дьокутааттара Олег Марков 12, Захар Никитин 5, Тихон Скрябин 3 анал байыаннай дьайыыга сылдьар байыастар дьиэ кэргэннэригэр сурутуу бэлэхтээбиттэрэ. Ил Түмэн дьокутаатынан өр сылларга үлэлээбит Юрий Баишев сыллата биир дойдулаахтарыгар Лоомтукаларга 4-түү бэтэрээҥҥэ успуонсардыыр. Кинилэргэ барҕа махталбытын биллэрэбит.
Биирдиилээн урбаанньыттар, Майаттан “Вилена” маҕаһыын Дьабыыл нэһилиэгин биэс ыалыгар, “Талер” маҕаһыын хаһаайына Дмитрий Катакинов Майа сэлиэнньэтин икки ыалыгар сыллааҕы сурутууну хаһыс да сылларын бэлэхтээтилэр.
Балыктаах нэһилиэгин олохтоох дьаһалтын баһылыга Александр Куприянов, баһылыгы солбуйааччы Иван Мохначевскай, бэтэринээр учаастага биир дойдулаахтарыгар биирдии сурутууну биэрбиттэрэ. Догдоҥо нэһилиэгиттэн дьокутаат Иван Пивоваров 2, уопсастыбаннай кэрэспэдьиэн Светлана Иванова 2, Майаттан Инна Николаева, Майя Ильина 1-дии үлэ бэтэрээнигэр, Төҥүлү орто оскуолатын 1975 с. бүтэрбит 10 «б» кылаас оҕолоро 4 анал байыаннай дьайыы кыттыылаахтарын дьиэ кэргэнигэр сыллааҕы сурутууну бэлэх ууммуттарын махталынан ахтабыт.
“Эркээйи” хаһыат ааҕааччыларыгар сонуннары сойуппакка таһаарарга итиэннэ күнүгэр тиэрдэргэ кыһаллар. Онон сибээстээн, Майатааҕы «Түмэн» уопсастыбаннай сүбэ салайааччыта Мария Лукина көҕүлээһининэн тэриллибит “Эркээйи волонтердара” хамсааһын үһүс сылын үлэлиир. Манна эдэр ийэлэр Акулина Устинова, Евдокия Заровняева, Саргылана Васильева уонна Полина Осипова үлэлэрин быыһыгар хаһыаты тахсыбыт күнүгэр чэппиэргэ ылан аадырыстарынан тиэрдэргэ кыһаллан сүүрэллэр-көтөллөр. Быйыл күһүҥҥүттэн кинилэргэ Любовь Дьячкова эбилиннэ.
Мэлдьи өйүүр успуонсардарбытыгар уонна сүүрүүнэн сылдьар иһирэх санаалаах волонтердарбытыгар махталбыт муҥура суох, салгыы даҕаны бииргэ үлэлиэхпит диэн эрэнэбит.
Үүнэр 2025 сылга сурутуу хампаанньата алтынньы ыйтан саҕаламмыта. Хаһыаппыт сыаната эрэдээксийэттэн ылыыга 6 ыйга – 528, сылга 1056, электроннай аадырыска сурутууга 6 ыйга 582, сылга 1164 солк. Маны сэргэ, почта бары отделениеларыгар сурутуу ыытыллар.
“Эркээйини» сурутан ааҕыҥ, «Эркээйилиин» бииргэ буолуҥ!”
Эрэдээксийэ.