Ахсынньы 21 күнүгэр Төҥүлүгэ «Үтүөҕэ кынаттыыр аналлаахтар» кинигэ Күн сирин көрбүтүн бэлиэтээтилэр.
Кинигэни Саха Өрөспүүбүлүкэтин үөрэҕириигэ туйгуна, бэтэрээн учуутал Елизавета Николаевна Баишева хомуйан оҥордо. Кинигэҕэ ытык ыал Павловтар төрдүлэрин-уустарын туһунан бэйэлэрэ суруйан хаалларбыт матырыйааллара, алтыспыт дьоннорун, оҕолорун ахтыылара, түмүллэн киирдилэр. Кинилэр олорон ааспыт олохторо, үлэлэрэ, дьоҥҥо-сэргэҕэ үтүө сыһыаннара сырдыкка, үтүөҕэ эрэ сирдиир аналлаахтара итэҕэтиилээхтик арыллар.
Төһө да сайдыылаах сүүрбэ биирис үйэҕэ олордорбут хантан хааннаахпытын,кимтэн кииннээхпитин кэлэр кэнчээри ыччаттарбытыгар тиэрдэр эбээһинэстээхпит. Төрдүбүт-ууспут бу сыллар тухары илдьэ кэлбит дьарыга, үгэһэ оҕолорбутугар, сиэннэрбитигэр үйэттэн үйэҕэ бэриллэн иһиэхтээх. «Ийэлээх аҕабыт тустарынан бэйэлэрин санааларын тиэрдибит бары дьоммутугар, үтүө санааҕытынан дьоммут ааттара, үлэлээбит үлэлэрэ, олорбут олохторо ааҕааччы өйүгэр-санаатыгар өлбөөдүйбэт өйдөбүл буолан хаалыаҕа», ‒ диэн истиҥ махтал тылларын тиэрдэллэр.
Айталына Борисова, Төҥүлү
