Екатерина Романова,
Майатааҕы «Кэнчээри» оҕону сайыннарар киин дириэктэрэ:
Владимир Владимирович Путин аһаҕас эпиирин көрөн олорон Бэрэсидьиэммит дойдутун бар дьонун интэриэһин чахчы көмүскүүр кыахтаах, дьиҥнээх национальнай лиидэр буоларын өйдөөтүм. Ону кини хас биирдии ыйытыкка чопчу хоруйу билэриттэн, өйдөнүмтүө тылынан аһаҕастык кэпсэтэриттэн, үтүө ыралаах, инникигэ эрэллээх эппиэттэриттэн биллим.
Пресс-кэмпириэнсийэ бастакы чааһыгар сыыппаралары, чахчылары аҕалла: хамнас үрдүүрүн, үлэтэ суох буолуу аччаабытын, киһи олорор үйэтэ уһаабытын эттэ. Күүтүллүбүтүн курдук, анал байыаннай дьайыы, тыа хаһаайыстыбатын, суол-иис, биэнсийэ, босуобуйа хайысхаларын таарыйар элбэх ыйытык киирдэ.
Анал байыаннай дьайыы кыттыылаахтарыгар уонна дьиэ кэргэннэригэр көмөлөһөр волонтердарга улахан махталын тиэртэ. Арассыыйа тас дойдулары кытары сыһыаныгар элбэх үчүгэй өрүтүн иһитиннэрдэ.
«Киһиэхэ, кини олоҕор үөһээ айыылартан кэлэр саамай улахан бэлэх – бу кини оҕолоро, оҕолорун оҕолоро» диэн этиитин олус сөбүлээтим. Биһиги дойдубутугар олохтоммут дьиэ кэргэн сыаннастарын, элбэх оҕолоох дьиэ кэргэннэри салгыы өйөөһүн баар буолуохтааҕын бэлиэтээтэ.