Саха дьахталларыттан биир бастакынан айар үлэ умсулҕаннаах иэйиитигэр ылларбыт поэтесса Марфа Куличкина төрөөбүтэ 95 сылын туолла. Марфа Куличкина айар үлэ алыбыгар эдэр сылдьан ылларбыт уонна дьон кутун тутуон тутар үгүс хоһооннору, ырыалары суруйан хаалларбыта.
Ахсынньы 11 күнүгэр Дмитрий Ходулов аатынан норуот айымньытын дьиэтигэр Марфа Куличкина ырыа буолбут хоһооннорунан саха эстрадатын чаҕылхай сулустара Саарын, Айгылаан, Дайаана, Константин Степанов, Терентий Егоров, ырыа куттаах биир дойдулаахтарбыт кыттыылаах “Мэҥэ Хит” бырайыагынан “Ырыанан ылланар ыралар” диэн диэн ааттаммыт истиҥ-иһирэх кэнсиэр ыытылынна. Кэнсиэри Мэҥэ Хаҥаластааҕы култуура уонна духуобунай сайдыы управлениетын методиһа Наталия Пахомова иилээн, режиссердаан ыытта. Кэнсиэр ыытааччыта Наталия Гаврильевна поэтесса Марфа Куличкина хоһоонунан саҕалаата. «Кыталык» норуодунай ансаамбыл солистката Алия Дмитриева “Уһуктуу” иэйии үҥкүүнэн киэргэттэ. Бу киэһэ көрөөччүлэр Төҥүлүтээҕи «Туйаара» уонна «Мичээрдэр» дьахталлар вокальнай ансаамбылларын нарын куоластарын сэҥээрэ иһиттилэр.
Марфа Куличкина поэзиятын ааҕааччыга аан бастаан киэҥник сырдаппыт, талаанын үйэтиппит киһинэн биир дойдулааҕа, өрөспүүбүлүкэҕэ биллэр спортивнай комментатор, суруналыыс Илья Скрябин буолар. Илья Ильич Марфа Куличкина «Үрүҥ түүн» хоһооннорун хомуурунньугун таһаарбыт ааптар, бу киэһэ учууталын туһунан ахтан-санаан ааста. РФ Суруналыыстарын сойууһун чилиэнэ, дьиэ кэргэн педагога, СӨ Ытык Сүбэтин Үрдүкү сэбиэтин чилиэнэ Любовь Аргунова «Күөрэй дуу, күөрэгэйим» диэн кинигэни хомуйан таһаарбыта. Бу киэһэ Любовь Семеновна Марфа Куличкина туһунан ахтан, бииргэ алтыспыт кэмнэриттэн истиҥник кэпсээтэ. Дьаҥхаады нэһилиэгин оҕолорун музыкальнай ноталаах кинигэлэрин Любовь Семеновна улуустааҕы киин бибилэтиэкэ дириэктэригэр Марианна Никанороваҕа бэлэх уунна.
Марфа Петровна балтыта Евдокия Куличкина эдьиийин олоҕуттан көрөөччүлэргэ сырдатта, аймахтар ааттарыттан тэрийээччилэргэ махтанна.
Саха өлбөөдүйбэт талаана Валерий Ноев мелодиятыгар Терентий Егоров «Күөрэгэй», педагогическай үлэ бэтэрээнэ, СӨ үөрэҕириитин, култууратын туйгуна, Төҥүлү нэһилиэгин Бочуотттаах олохтооҕо Федор Шарин, итиэннэ Федор Иннокентьевич олоҕун аргыһа РФ үөрэҕириитин Бочуоттаах үлэһитэ Галина Шарина, “Ой дуораана” оҕолор ансаамбыллара, саха эстрадатын чаҕылхай сулуһа Айгылаан, Баатара нэһилиэгин баһылыга Дмитрий Акимов истиҥтэн истиҥ ырыалары көрөөччүлэргэ бэлэх ууннулар. Таптал истиҥ лирикатын улууспут сайдам ыаллара Алена, Николай Васильевтар, Алена, Гаврил Ефимовтар уонна ытык ыал Джанна, Юрий Неустроевтар Марфа Куличкина хоһооннорун аахтылар. Анаан-минээн ыраах Кэбээйиттэн айаннаан кэлбит Константин Степановка көрөөччүлэр биһирэбиллэрин биллэрдилэр. Суола кыргыттара «Дьүөгэлиилэр» ансаамбыл, саха эстрадатын чаҕылхай сулустара Саарын, Ирена Файрушина, И.М.Сосин аатынан улуустааҕы киин бибилэтиэкэ «Сайар» литературнай бөлөҕө, Прокопий Федоров, «Айыллаан аартыктара» квартет дууһалыын долгуйан ырыа, поэзия түһүлгэтин бэлэхтээтилэр.
Марфа Куличкина айар үлэтигэр аналлаах ахтыы кэнсиэрэ үрдүктүк, өрө көтөҕүллүүлээхтик барда. Инникитин даҕаны Марфа Петровна ырыаһыт-поэтесса быһыытынан суруйбут хоһоонноро куруук үүнэр көлүөнэни, кэрэҕэ-үрдүккэ угуйа туруохтара диэн эрэнэбит.
Марина Трифонова.
