Саха дьоно уһун кыһыны туоруур аспытын хаһаанар Байанай ыйыгар үктэнэн бултуур-алтыыр, идэһэ туттар, балыкка сылдьар өбүгэ саҕаттан үтүө үгэспит көлүөнэттэн көлүөнэҕэ салҕанар айылгылаах.
Ол чэрчитинэн сэтинньи 11 күнүгэр 2-с Баатара нэһилиэгин уостан түспэт ырыа буолбут Лэбийэ алааһыгар улахан муҥха буолла. Майа сэлиэнньэтин дьаһалтата Байанай ыйыгар оҥорор үтүө үгэһин салҕаан, 2 оптуобуһу толору аҕам саастаахтары, үлэ бэтэрээннэрин, уопсастыбанньыктары тиэйэн илдьэн муҥхаҕа сырытыннаран биир кэрэ-бэлиэ күнү бэлэхтээтэ. Айаҥҥа турунуох иннинэ дьаһалта баһылыгын социальнай боппуруостарга солбуйааччы Вячеслав Санников бэтэрээннэргэ алгыстаах, байанайдаах сырыыны баҕарда.
Олохтоох дьаһалта кылаабынай исписэлииһэ Виктория Федорова итиэннэ түөлбэлэри кытта үлэ исписэлииһэ Жанна Тумусова муҥхаҕа барааччыларга сыһыарыллан көрө-истэ, көмө-тирэх буола сырыттылар.
2-с Баатара нэһилиэгин баһылыга Дмитрий Акимов:
- Бүгүн муҥхалаабыппыт иккис күнэ. Бэҕэһээ Күрүөлээх диэн сиргэ Ыччат муҥхатын тэрийэн ыыппыппыт. Манна урукку Дьоруой Попов сопхуоска киирэр нэһилиэктэр ыччаттарын икки ардыларыгар күрэх буолбута. Онно Дьаҥхаады нэһилиэгэ 1-кы миэстэни ылан көһөрүллэ сылдьар куубагы ылбыта. Эбэбит бэҕэһээ бэрсибит балыгын ыалдьыттарга, олохтоохторго түҥэппиппит. Бүгүн аатырбыт, ырыаҕа ылламмыт Лэбийэ алааспытыгар муҥхаҕа элбэх ыалдьыттар кэлбиттэрэ, нэһилиэнньэ тахсыбыта наһаа үчүгэй. Уопсай күүһүнэн өбүгэттэн кэлбит үгэспитин ыччакка биэрэн-үөрэтэн маннык муҥха тэриллэрэ үчүгэй. Эбэбит үллэрэр балык бэрсэн, кэлбит дьоммутун илии тутуурдаан ыыттыбыт, — диэн үөрбүт санаатын үллэһиннэ.
Муҥхаҕа барыта 300-тэн тахса киһи, о.э. 55 массыына, 3 оптуобус киһи сырытта диэн аахтылар. Ол иһиттэн улуустааҕы култуура, нэһилиэнньэ социальнай көмүскэллээх буолуутун, үөрэх управлениеларын, Аллараа Бэстээхтэн “Туймаада-Нефть” тэрилтэ, Майатааҕы үөрэтэр-оҥорон таһаарар кэмбинээт үлэһиттэрэ тиийбиттэр. 4 муҥханы сэргэ нырыы буолан аҕам саастаах дьонтон уратылар туран ылбакка хамсаннылар. Ол эрэн, улахан муҥхабыт иҥнэн хаалан кураанахтыы хостонно. Түмүгэр сэттэлии буолан биирдии куул балыгы үллэһиннибит.
Ф.К.Попов аатынан Баатара орто оскуолатын кадет кылаастарын үөрэнээччилэрэ сатыы кэлэн өбүгэ дьарыгар кыттан, мууһу аннынан балыктааһын, муҥха кистэлэҥнэрин билсэн-көрсөн, илии тутуурдаах эмиэ сатыы бардылар. Сылаас халлаан туран, тыала-кууһа суох күн үүнэн, бары сүргэбит көтөҕүллэн, олус бэркэ табыллан сырыттыбыт.
“Кыталык” ОЫЭК суоппара Сергей Андросов бу күннээҕи өлүү балыгын Анал байыаннай дьайыы кыттыылаахтарыгар иистэнэр сыах иистэнньэҥнэригэр анаан биэрдэ.
Муҥхаҕа сылдьыбыт дьон сибиэһэй, ыраас салгыҥҥа дуоһуйа сынньанан, Күөх Боллох көмүс хатырыктааҕыттан күндүлэтэн, өттүк харалаах кэлэннэр итиэннэ дьиэҕэ олорор дьон манна көрсөн иһирэхтик сэһэргэһэн, күннээҕи сонуннарын үллэстэн ирэ-хоро кэпсэтэн астыннылар. Кинилэр Сыымах муҥхалаах дьонугар, дьаһалтатыгар, оптуобус суоппардарыгар, Майа сэлиэнньэтин дьаһалтатыгар махтал истиҥ тылларын анаатылар.
Марелла Баишева.
