Кулун тутар 27 күнүгэр Р.И.Брызгалов аатынан Транспорт техникумугар улуустааҕы үлэ дьаарбаҥката тэрилиннэ.
Манна уопсайа 235 үлэ көрдөнөөччү, 200-тэн тахса оскуола үөрэнээччилэрэ уонна устудьуоннар кэлэн кыттыыны ыллылар.
Дьаарбаҥкаҕа 15 аһаҕас үлэ миэстэлээх тэрилтэлэр: 6 тутуу, 6 тыа хаһаайыстыбатын эйгэтиттэн, Росгвардия, улуустааҕы бэтэринээрийэ, Майа сэлиэнньэтин дьаһалтата турдулар. Ону тэҥэ, үрдүкү сүһүөх үөрэнээччилэригэр анаан 6 орто уонна 2 үрдүк үөрэх кыһалара кэлэн бэйэлэрин туһунан билиһиннэрдилэр.
Быйыл улууспутугар 9 кылааһы бүтэрэр 595, 11 кылааһы бүтэрэр 336 үөрэнээччи баар. Оҕолорбут идэлэрин таба талалларыгар маннык үлэ, үөрэх дьаарбаҥката тэриллэрэ олус табыгастаах.
Бу бэлиэ күнүнэн улуус баһылыгын тутуу боппуруостарыгар солбуйааччы Василий Филиппов, улуустааҕы дьарыктаах буолуу киинин салайааччыта Федор Белолюбскай, Транспорт техникумун дириэктэрэ Иннокентий Оконешников олохтоохтору үлэнэн хааччыйыы, нэһилиэнньэ дьарыктаах буолуутун ситиһии суолтатын бэлиэтээн туран, мустубут дьону эҕэрдэлээтилэр.
Нэһилиэнньэ дьарыктаах, үлэлээх буоларыгар анаммыт тэрээһин туһалаах буолуо диэн эрэнэбит.
Мэҥэ Хаҥалас улууһун дьаһалтатын пресс-сулууспата.
