Үһүс көлүөнэ оскуолата чөл олоҕу көҕүлүүр

“Кыталык” улуустааҕы социальнай бэлиитикэҕэ управление киинигэр ыам ыйын 8 күнүгэр Людмила Заровняева-Стручкова салайааччылаах Майатааҕы Үһүс көлүөнэ оскуолата национальнай оонньууларга куубагар 60 саастарыттан үөһэ саастаах бэтэрээннэргэ күрэхтэһии иккис төгүлүн ыытылынна.

Манна улуустааҕы социальнай бэлиитикэҕэ управление начаалынньыга Октябрина Кулешова, исписэлииһэ Ньургуяна Охлопкова, И.М.Сосин аатынан Майатааҕы киин бибилэтиэкэ сүрүннүүр бибилэтиэкэрэ Капиталина Игнатьева кыттыыны ыллылар. Тэрээһин кыттыылаахтарын Розалия Терентьева салайааччылаах “Иэйии” үҥкүү куруһуогун кыттыылаахтара флешмоб үҥкүүнэн эҕэрдэлээтилэр.

Хабылык, хаамыска, мохсуо, сыал быраҕыы, таабырын таайыыта уонна эстэпиэтэ көрүҥнэригэр уопсайа 4-түү киһилээх 6 хамаанда кииристэ. Сүрүн судьуйанан Владимир Попов, судьуйаларынан Василий Романов, Федора Наумова, Антонина Петрова үлэлээтилэр.

Хаамыскаҕа Розалия Терентьева, хабылыкка Анна Романова, мохсуоҕа Мария Кычкина, сыал быраҕыыга Галина Пономарева 1 миэстэ буолан кыайыы өрөгөйүн биллилэр.

Хамаанданан күрэхтэһиигэ 1-кы миэстэни Татьяна Попова хапытааннаах “Тандрам” хамаанда ылан көһөрүллэ сылдьар куубак хаһаайынынан иккис төгүлүн буолла. Яна Иванова хапытааннаах “Дартс” хамаанда 2-с миэстэни, Екатерина Иванова хапытааннаах “Чэбдик” хамаанда 3-с миэстэни ыллылар.

Күрэхтэһии балаһыанньатынан үстэ субуруччу бастаабыт хамаанда куубагы үйэ-саас тухары илдьэ хаалыахтаах. Майатааҕы Үһүс көлүөнэ оскуолата чөл олоҕу көҕүлүүр сыаллаах күрэхтэһиитэ элбэх дьону түмэн ситиһиилээхтик ыытылынна.

 

Марелла Баишева.