Быйылгыттан Саха сиригэр Ил Дархан Айсен Сергеевич Николаев өйөбүлүнэн “Мин бастакы идэм” үрдүкү кылаас үөрэнээччилэрин өйүүр суолталаах хамсааһын — саҥа бырайыак олоххо киирбитэ. Бу бырайыакка олоҕуран Үөрэтэр-оҥорон таһаарар киин салгыы сайдар суолу тобулар.
Ахсынньы 20 күнүгэр «Үгэс. Уопут. Инновация. Хаачыстыба» диэн эбии үөрэхтээһин педагогтарыгар, мэтэдьиистэригэр улуустааҕы сэминээр ыытылынна. Сэминээр ыҥырыылаах ыалдьыттарынан экэнэмиичэскэй наука хандьыдаата, доцент, ХИФУ ФТИ күндү таастарга уонна металларга технология кафедратын сэбиэдиссэйэ Варвара Дмитриева, ХИФУ ФТИ күндү таастарга уонна металларга технология кафедратын старшай преподавателэ Георгий Потапов, П.П.Романов аатынан Дьокуускайдааҕы художественнай училище преподавателэ Айаал Софронов, Дьокуускайдааҕы художественнай училище устудьуоннар производственнай быраактыкаларын сүрүннүүр салайааччы Григорий Терешкин, норуот маастара, маастар-муосчут, Ил Дархан стипендиата Николай Баишев, тимир ууһа, Саха Өрөспүүбүлүкэтин норуотун маастара, Ил Дархан стипендиата Леонид Говоров уонна ХИФУ, ДьХУ устудьуоннара буоллулар.
Сэминээр тэриллибит биир сүрүн төрүөтүнэн декоративнай-прикладной ускуустуба салаатыгар идэлээх исписэлиистэри бэлэмниир Дьокуускайдааҕы художественнай училищены уонна ХИФУ инженер-технологтары бэлэмниир салаатын кытары бииргэ утумнаахтык үлэлэһэргэ сөбүлэҥ түһэрсии буолла. Күн устата маастар кылаастар ыытылыннылар. Сэминээр сыалын соругун ситэн, сайдар кэскил туһугар салгыы үлэлиир соруктары уурар инникилээх кэпсэтиилэр таҕыстылар.
Лина Маркова, үөрэтэр-оҥорон таһаарар киин мэтэдьииһэ
