Кулун тутар 18-20 күнүгэр Майаҕа өрөспүүбүлүкэтээҕи психоневрологическай диспансер исписэлиистэрэ үлэлии сылдьаллар.
Психотерапевт быраас Иван Замятин, медицинскэй психолог Евгения Львова уонна психиатр быраас Мария Брызгалова анал байыаннай дьайыыга сулууспалыы сылдьар биир дойдулаахтарбыт чугас дьонноругар доруобуйаларын, уйулҕаларын туругар сыһыаннаах сүбэ-ама биэрдилэр, баҕалаахтары кытта биирдиилээн сэһэргэстилэр.
Иван Замятин иһитиннэрбитинэн, анал байыаннай дьайыыга сылдьар уолаттарбыт дьиэ кэргэннэрэ туруктаах буолалларыгар, уоппускаҕа кэлбит киһи дойдутугар кэлэн чөлүгэр түһэн барарыгар анаан улуус аайы медико-психологическай көмө кэбиниэттэрэ тэриллэн эрэллэр эбит.
Саха дьоно, тыйыс айылҕалаах буолан, үөрүүбүтүн-хомолтобутун испитигэр тутабыт, сатаан таска таһааран биллэрбэппит, ытаабаппыт-соҥообоппут, дьоҥҥо үҥсэргии сылдьыбаппыт. Ол доруобуйабытыгар охсор, араас ыарыыга кубулуйар диэн этэр. Анал идэтийбит үөрэхтээх биригээдэ кэлбитигэр тустаах дьон кыбыстыбакка кэлэн билсиҥ, сылдьан кэпсэтиҥ диэн ыҥырар. Быраастар бүгүн-сарсын үлэлииллэрин биллэрэллэр.
Үлэлии кэлбит психологтары улуус кылаабынай бырааһын солбуйааччы Люция Матчитова арыаллыыр. Тэрээһиҥҥэ чугас нэһилиэктэртэн, Чүүйэттэн, Хаптаҕайтан кэлэн иһиттилэр, сүбэ-ама ыллылар.
Елизавета Неустроева.
