Ахсынньы 7 күнүгэр Балыктаах орто оскуолатын 80 уонна «Ыллыкчаан» оҕо образцовай ансаамбыла 30 сыллаах үбүлүөйдэрэ буолбута. Бу күн оскуоланы араас сылларга бүтэрбит выпускниктара, ыҥырыылаах ыалдьыттар, нэһилиэкпит тэрилтэлэрэ, ыраахтан-чугастан дьон-сэргэ үөрэ-көтө муһунна.
Ырыаҕа ылланар сүүһүнэн уоттардаах Балыктаах бөһүөлэгэр үүнүү-сайдыы кыһатын иннигэр биллиилээх судаарыстыбаннай, бэлитиичэскэй уонна уопсастыбаннай диэйэтэлгэ Михаил Прокопьевич Габышевка анаан туруоруллубут бюһу үөрүүлээхтик астылар. Бюст ааптардара уһулуччу талааннаах саха уран тарбахтаах худуоһунньук уонна скульптор Сергей Лукин уонна Павел Чямпин кыттыыны ыллылар. Ытык киһибитигэр анаан туруоруллубут бюһу аһар чиэс балтыгар Парасковья Прокопьевна Габышеваҕа,кыыһыгар Светлана Баишеваҕа, Люлия Николаевна Григорьеваҕа, Саха АССР Үрдүкү Сэбиэтин, Саха Өрөспүүбүлүкэтин аҕам саастаахтар түмсүүлэрин бэрэссэдээтэлигэр, Иван Иннокентьевич Корякиҥҥа, Михаил Прокопьевич үөрэнээччитигэр, юстиция генерал майоругар, Юрий Петрович Баишевка, «Сулус» физкултуурунай-чэбдигирдэр спортивнай комплекс салайааччытыгар, оскуола дириэктэрэ Егор Николаевич Ивановка, «Мэҥэ нэһилиэгэ» тыа сирин түөлбэтин баһылыгар уонна Иннокентий Иннокентьевич Андросовка, Мэҥэ Хаҥалас улууһа муниципальнай оройуон дьокутааттарын Сэбиэтин бэрэссэдээтэлигэр бэрилиннэ,эҕэрдэлэрин тиэртилэр.
Салгыы оскуолаҕа киирэн алгыс сиэрин-туомун оскуолабыт выпускнига, алгысчыт, бөлүһүөк Баайаҕантай Кулан Хаан Сэргэй уола толордо.
Үөрүүлээх тэрээһини эҕэрдэ тылынан оскуола дириэктэрэ Егор Иванов аста.
80 сыл анараа өттүгэр, 1944 сыллаахха балаҕан ыйын 15 күнүгэр «Социализм суола» холкуос бэрэссэдээтэлин Никон Михайлович Харитонов туруорсуутунан Күөллэрики сиригэр билии кыһата алын кылаас үөрэнээччилэригэр аанын арыйбыта, онон кэлэр кэскил, кэнчээри ыччат туһа диэн билии кыһатын түөрэҕэ түспүтэ. Никон Михайлович кыыһа Марианна Никоновна Товарова уонна сиэнэ Варвара Иванова, саҥа оскуола бастакы сэбиэдиссэйэ,эргиччи талааннаах норуот учуутала ааттаммыт Иннокетий Дмитриевич Баишев, кини кэргэнэ билии сырдык эйгэтин арыйбыт маҥнайгы учуутал Александра Алексеевна Плотникова кыргыттара, Баишевтар педагогическай дьиэ кэргэн династиялара бэлиэлээх Галина Иннокентьевна Шарина, Наталья Иннокентьевна Черосова оскуола үбүлүөйүнэн эҕэрдэлээтилэр.
Балыктаах орто оскуолатыгар 80 сыл устата үгүс ахсааннаах учууталлар, дириэктэрдэр үлэлээн аастахтара. Кинилэр оскуола сайдыытыгар, үүнэр көлүөнэни үөрэтиигэ-иитиигэ бэйэлэрин үгүс кылааттарын киллэрбиттэрэ. Араас сылларга үлэлээбит дириэктэрдэр, улууспут оскуолаларын билигин үлэлии сылдьар дириэктэрдэрэ, нэһилиэкпит тэрилтэлэрин салайааччылара бу үөрүүлээх күҥҥэ эҕэрдэ кэһиилээх кэллилэр.
М.П.Габышев аатынан Балыктаах орто оскуолатын 80 сылын көрсө үөрэх уонна иитэр үлэ эйгэтэ сайдыытыгар сүҥкэн кылааттарын,өр сыллаах үлэлэрин иһин үлэлээн ааспыт бэтэрээннэри, үлэлии сылдьар кэллэктиип бары үлэһиттэрин наҕараадалаатылар, истиҥ эҕэрдэлэрин тиэртилэр. «Мэҥэ Хаҥалас улууһа» муниципальнай оройуон депутаттарын Мунньаҕын Бэрэссэдээтэлэ Иннокентий Андросов, СӨ Ил Түмэн Судаарыстыбаннай Мунньаҕын дьокутаата Геннадий Васильев, «Сулус» физкултуурунай-чэбдигирдэр успуорт комплекс салайааччыта Юрий Баишев, Мэҥэ Хаҥалас үөрэҕириитин салалтатын салайааччыта Гаврил Толстяков, Мэҥэ Хаҥалас улууһун үөрэҕин үлэһиттэрин боропсойууһун бэрэссэдээтэлэ Иннокентий Скрябин, «Мэҥэ нэһилиэгэ» тыа сирин түөлбэтин баһылыга Александр Куприянов, Балыктаах орто оскуолатын дириэктэрэ Егор Иванов кытыннылар.
Үбүлүөй үөрүүлээх чааһа түмүктэнэн ыҥырыылаах ыалдьыттары сылаас астаах сандалыга ыҥыран аһаттылар. «Ыллыкчаана ‒ оҕо сааһым суолчаана» ‒ «Ыллыкчаан» Саха Өрөспүүбүлүкэтин оҕо үҥкүүтэ көрдөрүүлээх ансаамбыла 30 сыллаах үбүлүөйүгэр анаммыт эҕэрдэ кэнсиэрин көрдөрдүлэр. Оскуола устун экскурсия, «Дорообо, тапталлаах оскуолам!» быыстапка, «Ааспыт кэм ахтылҕана» выпускниктар парааттара, «Оонньоон ааспыт оҕо сааһым…» көлүөнэлэр истиҥ көрсүһүүлэрэ. Уоттаах-күөстээх «Балыктаах киэһэтэ» шоу-дискотека ыытылынна.
Үбүлүөй олус үрдүк таһымнаахтык ыытылынна диэн сылдьыбыт дьон махтаннылар. Үөрэн-көтөн, сынньанан дойдуларын ыраас салгынынан дуоһуйа тыынан, биир дойдулаахтарын, өр көрсүбэтэх доҕоттордуун көрсүһэн астынан тарҕастылар.
Мария Захарова. Балыктаах.
