Майа ыала Саргылана Васильева кэргэниниин Никон Поповтуун “Ивушка” даача илин уһугар Уһук Илиҥҥи гектарынан ылбыт сирдэригэр икки этээстээх 6х7 кв.миэтэрэ иэннээх барнхаус дьиэ туттан урбаанньыт быһыытынан үлэлэрэ саҕаламмыт.
Аҕалара Никон Попов ДьУоКХ тэрилтэҕэ операторынан үлэлиир. Никон Петрович ипотека ылан, тутуу биригээдэтин ыҥыран, онно бэйэтэ үлэлэһэн, дьиэ ааспыт кыһын тутуллубут. Кини уһанар дьоҕурдаах, онно эбии монтер, сантехник оҥорор үлэлэрин эмиэ бэйэтэ оҥорон, дьиэ хаачыстыбалаахтык оҥоһуллубут. Мантан кэргэнэ үөрэрин, астынарын эттэ. Салгыы дьиэлэрин уотун-күөһүн киллэриигэ, ититэр ситимин тартарыыга, муостатын сылытыытыгар, миэбэлинэн хааччыллыытыгар Саргылана Ивановна биисинэс былаан көмүскээн, дьиэ силигэ сиппит. Иһин-таһын кырааскатыгар аймахтара, дьүөгэлэрэ көмөлөспүттэр.
Саргылана Васильева уруккуттан тугу эмэ кэрэни айыан-оҥоруон, киэргэтиэн баҕарар баҕа санаата кэргэнин күүстээх өйөбүлүнэн олоххо киирбит. Бу үөрүүлээх сонунун үллэстээри Арассыыйаҕа Ийэ күнүгэр уопсастыбаннай түмсүүлэргэ бииргэ алтыһар дьонун ыҥыран ыалдьыттатта, дьиэтин-уотун көрдөрдө.
Дьиэ ис-тас дизайнын дьиэлээхтэр бэйэлэрин илиилэринэн оҥорбут оҥоһуктарынан уоттаан-күөстээн киэргэппиттэр. Дьыл уларыйыытын кэминэн көрөн уларытан иһэллэр. Дьоро күннэргэ хаартыскаҕа түһэр зоналары оҥорбуттар. Бу эмиэ тиэмэлэринэн уларыйар. Аныгылыы истииллээх, панорамнай түннүктэрдээх, толору хааччыллыылаах, сылаас муосталаах дьиэҕэ ыалдьыттар быйыл күһүҥҥүттэн сылдьан эрэллэр эбит. Сылдьыбыт дьон үөрэн-астынан иккистээн кэлэллэрин эттэ хаһаайка.
Саргылана Ивановна, Никон Петрович түөрт оҕолоохтор, сиэннэрдээхтэр. Кыра кыыстара Николанна В.П.Ларионов аатынан орто оскуола 4-с кылааһын үөрэнээччитэ. Бу күн ийэтиниин ыалдьыттарын сэргэхситэн араас сиэдэрэй оҥоһуктарын үөрэ-көтө көрдөрдүлэр, араастаан хаартыскаҕа түһэрэн көмүс түгэни үйэтиттилэр.
Кэрэни кэрэхсиир үлэһит дьиэ кэргэн сайын олбуордарын тула декоративнай подсолнух, отонноох мастары олордубуттар, инникитин үүнээйи көрүҥүн элбэтэн, өссө кэҥэтэр былааннаахтар. Дьиэлэрин тула өттүнээҕи тыыннаах айылҕа улахан түннүктэринэн бу көстөн турара көрүөхтэн кэрэ, айылҕаҕа сылдьар курдук санааны үөскэтэр. “Салгына ураты үчүгэй манна” диэн хаһаайка астынан харахтара уоттанар.
Манна мустубут дьону кылгастык сырдаттахха, Саргылана Васильева “Түмэн” уопсастыбаннай холбоһук икки түмсүүтүгэр көхтөөх чилиэн буолар. Екатерина Баишева Майа дьахталларын сэбиэтин салайааччынан үлэлии сылдьан дьахталлары арыйар “Айылгы” бырайыагы көмүскээн, грант ылары ситиһэн олоххо киллэрбитэ. Манна бэйэлэрэ баҕалаах 15 эдэр ийэлэр киирэн бэйэлэрин араас өттүттэн сайыннаран, дьоҕурдарын уһугуннаран, дьахтар эбиппит диэн сананан, бэйэлэригэр саҥа суоллары тобулан, күн бүгүн айымньылаахтык киэҥ эйгэҕэ үлэлии-хамсыы сылдьаллар.
“Түмэн” уопсастыбаннай холбоһук салайааччыта Мария Лукиналыын сүбэлэһэн, 2022 сыл тохсунньутуттан “Эркээйи” волонтердара” хамсааһыны саҕалаабыппыт. Манна “Айылгы” бырайыакка кыттыбыт уонтан тахса ийэттэн түөрт барыга көхтөөх, саамай тулуурдаахтара, дьулуурдаахтара хаалан күн бүгүн бэриниилээхтик волонтер эбээһинэһин толорон сүүрэ-көтө сылдьаллар. Кинилэргэ алта оҕолоох ийэ Акулина Устинова старостанан талыллыбыта. Кини кыһыннары-сайыннары 10 ыалга, икки оҕолоох Полина Устинова 7 ыалга, аҕыс оҕолоох ийэ Евдокия Заровняева 3 ыалга, икки оҕолоох Любовь Дьячкова 2 ыалга итиэннэ саҥа дьиэлээх хаһаайка Саргылана Васильева 5 тыыл бэтэрээннэригэр, сэрии сылын оҕолоругар, аҕам саастаах дьоҥҥо хаһыаты тахсыбыт күнүгэр дьиэлэригэр тиэрдэн кэллилэр. Кинилэр бүгүн манна ыҥырыллан кэлэн ыалдьыттыы олорон истиҥник сэһэргэстилэр, дьиэлээхтэри иһирэхтик эҕэрдэлээтилэр. Үлэһит дьонтон үлэ толлор диэбиккэ дылы, түмсүбүччэ инники былааннарын торумнаатылар. Екатерина Прокопьевна Саргылана Ивановналыын бириистээх оонньуулары оонньотон дэлби күллэрдилэр, дуоһута сынньаттылар.
Саргылана Васильева анал байыаннай дьайыы саҕаланаатын кытта иис сыаҕар бэйэтин иистэнэр массыынатын кыбына сылдьан иистэммитэ. Билигин бэйэтин дьыалатын арынан үөрүүтэ үтүмэн, идиэйэтэ элбэх, бу кэмҥэ Саҥа Дьылынан дьиэтин хайдах киэргэтэрин толкуйдуу сылдьар.
Саргылана Ивановнаҕа “Түмэн” уопсастыбаннай холбоһукка ыкса алтыһар биир түмсүүлээхтэрин ыҥыран ыалдьыттаппытыгар, истиҥ-иһирэх тыыннаах көрсүһүүнү тэрийэн, умнуллубат кэрэ күнү бэлэхтээбитигэр махтанабыт. Никоннаах Саргылаана биисинэстэрэ сайдан истин, сакаас киирэ турдун, сынньанар дьон махталлара дьиэлээхтэри саҥа үрдэллэргэ кынаттаатын диэн алгыыбыт.
Марелла Баишева.
