РФ үөрэҕириитин бочуоттаах үлэһитэ, СӨ үөрэҕириитин туйгуна, СӨ үөрэҕириитин эйгэтин бочуоттаах бэтэрээнэ, В.П.Ларионов аатынан Майа орто оскуолатыгар өр сылларга математика учууталынан, профсоюз бэрэссэдээтэлинэн үлэлээбит, Мэҥэ Хаҥалас улууһун математика учууталларын уонна хомусчут педагогтар холбоһуктарын, «Дьүрүлгэн» хомусчуттар куруһуоктарын салайааччыта Василиса Кузьминична Никифорова Майа сэлиэнньэтигэр кылааһынан бүттүүн хомустууру киллэрбитэ.
Кини сырдык аатын үйэтитэн, Хомус күнүгэр сөп түбэһиннэрэн, «Күргүөмүнэн хомус» хомус ансаамбылларын күөн күрэһэ аан маҥнайгытын ыытылынна.
Көрүү түмүгүнэн күргүөмүнэн хомус күрэҕин муҥутуур кыайыылааҕынан В.П.Ларионов аатынан Майа орто оскуолатын «Чугдаар» ансаамбыла, 8 “а” кылаас кэлэктиибэ тахсан 25000 солкуобай суммалаах туоһу суругнан наҕараадаланна.
Балыктаах оскуолатын «Сэргэхчэй» ансаамбыла 1-кы лауреат, Майатааҕы лиссиэй 8.1 кылааһын «Мандар хомус» ансаамбыла 2-с лауреат, В.П.Ларионов аатынан Майа орто оскуолатын 6 “г” кылааһын кэлэктиибэ 3-с лауреат аатын ыллылар.
1-кы дипломант Бүтэйдээх оскуолатын «Дьүрүскэн» ансаамбыла буолла, 2-с – В.П.Ларионов аатынан Майа оскуолатын 6 “а” кылааһын кэлэктиибэ, 3-с дипломант Павловскай оскуолатын «Төҥүргэс» ансаамбыла буоллулар.
Кыра бөлөххө Аллараа Бэстээх оскуолатын «Эрэлчээн», Бүтэйдээх оскуолатын «Дьүрүйээнэ» ансаамбыла, Ф.Г.Охлопков аатынан Майа орто оскуолатын «Тэтим» ансаамбыла туһааннааҕынан 1-кы, 2-с, 3-с лауреат ааттаннылар. Оттон В.П.Ларионов аатынан Майа оскуолатын 4 “а” кылааһын кэлэктиибэ, Аллараа Бэстээх «Хомусчаан», В.П.Ларионов аатынан Майа орто оскуолатын 2 “а” кылааһын кэлэктииптэрэ дипломант буоллулар.
Догдоҥо оскуолатын «Ноорой сиэннэрэ» ансаамбыла Олоҥхо дьиэтин «Иэйиилээх хомусчуттар» анал бирииһинэн наҕараадаланнылар.
