Сэтинньи ыйа — Байанай ыйа. Сахалар биир саамай ытыктыыр, сүгүрүйэр ыйбыт. Ону кытта сахаларга урут-уруккуттан үгэс буолан кэлбит муус аннынан балыктааһын – муҥхалааһын саҕаланар. Муҥха — саха норуотун өбүгэ саҕаттан илдьэ кэлбит үтүө үгэһэ аныгы да кэмҥэ суолтатын сүтэрбэт.
https://vk.com/video-211356349_456239395
Бүгүн, В.П.Ларионов аатынан Майа орто оскуолатын эр дьон учууталлара уонна 5-11 кылаас уолаттара Маамыкаан күөлүгэр Майа олохтоох дьаһалта уонна Майа эр дьонун түмсүүтүн көҕүлээһиннэринэн, «Муҥха-2023» муҥха үөрэҕэр сырыттылар. Тэрээһиҥҥэ соҕотох ийэлэр оҕолоро, баҕалаах уолаттар көхтөөхтүк кытыннылар. Муҥха сиэрин-туомун алгысчыт Зиновий Иванович Игнатьев ыытта. Тэрээһини нэһилиэк кырдьаҕас муҥхаһыта Дмитрий Николаевич Сидоров иилээн-саҕалаан салайда. Оҕолор төрүттэрбит үгэстэрин көрөн үөрэнэн, улахан дьону кытта тэҥҥэ үлэлээтилэр. Бу күҥҥэ кинилэр өбүгэ ситимин, сатабылын эттэригэр-хааннарыгар иҥэринэн, сибиэһэй салгынынан толору тыынан биир умнуллубат күнү атаардылар.
Светлана Ефимова
