Быйылгы үөрэх дьылыгар В.П. Ларионов аатынан Майа орто оскуолатын лиидэринэн 10 «в» кылаас үөрэнээччитэ Бурнашева Люба буолла.
Владимир Петрович Ларионов аатынан Майа орто оскуолатын «Клуб Ларионовцы» оҕо хамсааһынын лиидэригэр уопсайа 5 хандьыдаат турда. Куоластааһын ыытыллыан иннинэ хандьыдааттар нэдиэлэ устата быыбар хампаанньаларынан үлэлээлээтилэр, кылаастары кэрийэн үлэлэрин торумун сырдаттылар. Кинилэр сүрүннээн быйылгы үөрэх сылыгар Россия үөрэнээччилэр хамсааһыннарыгар сөп түбэһэннэрэн «Информационнай-медийнэй», «Гражданскай көҕүлээһин», «Личность быһыытынан сайдыы», «Байыаннай-патриотическай» хайысхаларынан үлэлиир былааннаахтарын иһитиннэрдилэр, итиэннэ сүрүн болҕомто араас аһымал акцияларга уонна бырайыактарынан үлэҕэ уурулунна. Онон, быыбар иннинээҕи нэдиэлэ оскуолабыт лиидэри талыы үлэтинэн «оргуйан» олордо, радиоузелынан лиидэри сырдатыы, хампаанньалары иһитиннэрии биэриилэрэ үлэлээтэ. Быыбар долгутуулаах күнэ балаҕан ыйын 22 күнүгэр ыытылынна. Онно 4 – 11 кылаас үөрэнээччилэрэ уонна учууталлар кытыннылар.
Оскуолабыт лиидэрин сүрэхтээһин тэрээһинэ балаҕан ыйын 27 күнүгэр Саха Өрөспүүбүлүкэтин Судаарыстыбаннаһын күнүгэр сөп түбэһиннэрэн ыытылынна. Оскуола дириэктэрин эбээһинэһин толорооччу Павел Васильевич Васильев быйылгы үөрэх сылыгар лиидэринэн талыллыбыт Бурнашева Любаҕа лиидэр бэлиэтин, оскуола лиидэригэр турбут хандьыдааттарга: Поисеева Дайаанаҕа, Попова Күүннэйгэ, Иванов Айталга, Попова Айыынаҕа уонна ааспыт үөрэх дьылыгар лиидэринэн үлэлээбит Жирков Дархаҥҥа оскуола оҕо хамсааһынын аатыттан бэлэхтэри туттарда. Итиэннэ дириэктэри иитэр үлэҕэ солбуйааччы Маргарита Климентьевна Афанасьева ааспыт үөрэх дьылыгар «Клуб Ларионовцы» оҕо хамсааһыҥҥа ситиһиилээхтик үлэлээбит быйылгы үөрэх дьылын 11 кылаас үөрэнээччилэригэр оскуола аатыттан махтал суруктары туттарда. Оскуола саҥа лиидэрэ Бурнашева Люба оскуола учууталларын уонна үөрэнээччилэрин иннилэригэр бэриниилээхтик үлэлиэм диэн андаҕар тылын эттэ. Бэлиэ тэрээһини «Клуб Ларионовцы» оҕо хамсааһынын активистарын уоттаах-күөстээх «флешмоб» үҥкүүлэрэ, Айтал Иванов ырыата киэргэттэ. Бу күн ыҥырыылаах ыалдьыттарынан Ф.Г. Охлопков аатынан Майа орто оскуолатын «Феникс» оҕо активистара буоллулар. Онон, оскуола бастыҥ үөрэнээччилэрэ биир түһүлгэҕэ мустан санаа атастаһыылаах, квест оонньуулаах, ырыалаах-үҥкүүлээх киэҥ хабааннаах тэрээһини ыыттылар.
Бурнашева Люба, 10 «в» кылаас үөрэнээчитэ, оскуола лиидэрэ:
-Мин оскуолабар лиидэринэн талыллыбыппыттан олус үөрдүм уонна долгуйдум. Лиидэр буолар – олус улахан эппиэтинэс. Лиидэр киһи оҕолору түмэр, элбэх идеялаах буолуохтаах дии саныыбын. Мин бастатан туран, оҕо хамсааһынын кэбиниэтин уларытыахпын баҕарабын. Көмө фондата арыйыахпын баҕарабын. Мин иннибинэ чаҕылхай лиидэрдэр үлэлээн ааспыттара. Кинилэр суолларын батаммын таһаарыылаахтык үлэлиэм диэн эрэнэбин.
Жирков Дархан, 2022 –23 үөрэх сылыгар оскуола лиидэрэ, 11 «б» кылаас үөрэнээччитэ:
— Ааспыт үөрэх дьылыгар спортивнай хамсааһыны сайыннараары киберспорт күрэхтэри, «Geek fest» тэрээһиннэри, коммунарскай сбордары уо.д.а ыыппыппыт. Мин санаабар, лиидэр диэн дьону түмэр, сатабыллаахтык салайан, ситиһиигэ тиэрдэр киһи буолуохтаах. Лиидэр киһи бастатан туран бэйэтин убаастыахтаах. Оҕо тэрилтэтин хамсааһына үөрэнээччигэ личность быһыытынан сайдарыгар олус элбэх кыаҕы биэрэр. Саҥа талыллыбыт лиидэргэ ситиһиини, биһиги ситэрбэтэх идеяларбытын ситэрдин.
«Мэҥэбил» пресс-киин
Хаартыска уонна видеоматырыйаалы оҥорон бэлэмнээтилэр: «Мэҥэбил» пресс-киин кэрэспэдьиэннэрэ Скрябина Сайаара, Скрябина Сандаара, Жондоров Борис, Аринкин Артем
