Саха Өрөспүүбүлүкэтин Бырабыытылыстыбатын 2023 сыл ахсынньы ый 21 күнүнээҕи 1221 нүөмэрдээх уурааҕар олоҕуран, В.П.Ларионов аатынан Майа орто оскуолата, өрөспүүбүлүкэ бастыҥ оскуолаларын ахсааныгар киирэн, быйыл «Ыраахтан салайыллар авиационнай көтөр тиһиктэр» (БАС – беспилотная авиационная система) национальный бырайыакка кыттар буолбута. Сэтинньи 18 күнүгэр оскуолаҕа саҥа «БАС» кэбиниэт үөрүүлээх быһыыга-майгыга арылынна.
Оскуола олоҕун биир улахан суолталаах тэрээһинигэр оскуола үөрэнээччилэрин уонна кэлэктиибин улуус баһылыга Дмитрий Тихонов, улуустааҕы үөрэх управлениетын начаалынньыга Гаврил Толстяков, Майа сэлиэнньэтин баһылыгын солбуйааччы Дмитрий Игнатьев, дириэктэр Павел Васильев эҕэрдэлээтилэр.
Кэбиниэт үлэтин саҕалыыр, аалай лиэнтэни быһар чиэс ыалдьыттарга уонна оскуола 11 «а» кылааһын үөрэнээччитигэр, бүтүн Арассыйатааҕы АГРОНТИ күрэх дипломаныгар, призеругар, «Агрокоптер» анал аат кыайыылааҕар Валера Михайловка бэрилиннэ.
В.П.Ларионов аатынан Майа орто оскуолатын дириэктэрин наукаҕа, иннавацияҕа солбуйааччы Сергей Горохов:
– Бүгүн биһиги оскуолабытыгар БАС кэбиниэтэ арыллан олус үөрүүлээх күн буолла. Бырайыак сүрүн сыала – оҕолору ыраахтан салайыллар авиационнай тиһиктэри көтүтэргэ, салайарга, программалыырга уонна өрөмүөннүүргэ үөрэтии буолар. Кэбиниэккэ биир кэмҥэ 16 үөрэнээччини дьарыктыахпытын сөп. Манна 5-11 кылаастар информатика, үлэ, ОБЗР биридимиэттэригэр, кылаас таһынан дьарыктарга туһанар тэриллэрэ кэллэ.
Бырайыагы олоххо киллэрэр инниттэн Майа оскуолатын алта учуутала Хабаровскайга учууталлар идэлэрин үрдэтэр кууруска үөрэнэн кэллилэр. Дойдубут «Геоскан» тэрилтэтэ араас элбэх оборудованиенан, үнүстүрүмүөнүнэн кэбиниэти толору хааччыйда, – диэн иһитиннэрдэ.
