Нөөрүктээйигэ Михаил Павлович Захаров төрөөбүтэ 100 сылыгар анаан улуус тэрээһинэ буолан ааста. Ыалдьыттар маҥнай Ленин сопхуос искибиэригэр сырыттылар, көрдүлэр-иһиттилэр.
Салгыы И.П.Игнатьев аатынан нэһилиэк түмэлигэр Михаил Павлович бүүһүн аһыллыыта буолла. Бүүһү «Нөөрүктээйи нэһилиэгэ» тыа сирин түөлбэтин дьаһалтата (баһылык Николай Федоров) Арассыыйа Худуоһунньуктарын сойууһун чилиэнэ, скульптор Николай Чоччасовка сакаастаан оҥортордо. Улуус баһылыга Дмитрий Тихонов эҕэрдэ тылы эттэ, ыалдьыттар Михаил Павлович сырдык мөссүөнүгэр сүгүрүйэн сибэкки дьөрбөтүн уурдулар.
«Айылгы» норуот айымньытын киинигэр үбүлүөй үөрүүлээх чааһа ыытылынна. Улуус баһылыга Дмитрий Тихонов, Ил Түмэн дьокутаата Андрей Находкин, ытыктыыр салайааччыларбыт Матвей Мучин, Люлия Григорьева, Догдоҥо нэһилиэгин баһылыга Петр Сивцев, Мэҥэ нэһилиэгиттэн Александр Куприянов, Нөөрүктээйиттэн Николай Федоров, Тараҕайтан Юрий Порядин ыалдьыттаан эҕэрдэ тыллары эттилэр.
Тэрээһиҥҥэ Михаил Павлович кэргэниниин бэйэлэрэ бүөбэйдээбит, Павловскай орто оскуолатыгар үөрэттэрбит сиэннэрэ Александра Ивановна Исакова, Михаил Михайлович Захаров, Захар Михайлович Захаров кэлбиттэрэ, эһэлэрин туһунан ахтыы оҥорбуттара биэчэри киэргэттэ.
Биэчэр иккис чааһа бэйэлэрин кэмнэригэр сопхуоска ситиһиилээхтик үлэлээбит, улууспут сайдыытыгар кылааттарын киллэрсибит дьоммут истиҥ иһирэх тылынан ахтан-санаан аастылар. Табаҕаттан К.К.Байкалов аатынан сопхуоска 25 сыл үлэлээбит, СӨ үтүөлээх зоотехнига Лаврентий Романов, Тыыллыматтан социальнай көмүскэллээх буолуу үтүөлээх үлэһитэ, СӨ социальнай сулууспатын туйгуна Татьяна Скрябина, Балыктаахтан үлэ бэтэрээнэ Руслан Мохначевскай, Хараттан 1970‒1990 сс. нэһилиэк олохтоох сэбиэтин бэрэссэдээтэлэ, нэһилиэк кырдьаҕастарын сэбиэтин салайар Валентина Бурнашева, Хаптаҕайтан СӨ норуотун хаһаайыстыбатын үтүөлээх үлэһитэ Екатерина Гаврильева, Нөөрүктээйиттэн СӨ тыа хаһаайыстыбатын туйгуна Любовь Оконешникова кытыннылар. Атах тэпсэн олорон сэһэргэһии бэрээдэгинэн ахтыы оҥорбуттара көрөөччүлэри астыннарда.
Биллиилээх салайааччы аатын үйэтитии салҕанар, кэлэр сылга Михаил Павлович туһунан кинигэ тахсыахтаах.
Нина Колосова. Нөөрүктээйи
