Кира Уткина, 6 кылаас, Чыамайыкы
Бу күннэргэ оскуолабытыгар Улуу Кыайыы 80 сылынан «Память Победы» диэн ааттаах 10 кылаас үөрэнээччитэ Александр Васильев уруһуйдарын быыстапката туруорулунна.
Саша хас да альбомҥа уруһуйдаабыт тааҥкаларын, хаартыскаларын уонна грамоталарын оҕолор, учууталлар сэргии көрдүбүт. Саша оҕолорго 1942 сыл от ыйын 17 күнүттэн саҕаланан баран 1943 сыл олунньу 2 күнүгэр түмүктэммит Сталинград куоракка өстөөҕү кытта кырыктаах киирсии туһунан кэпсээтэ. 200 күн устата буолбут бу кырыктаах кыргыһыыга мөлүйүөнүнэн киһи тыына быстыбыт эбит. Бу күнү билигин Арассыыйа үрдүнэн «День воинской Славы» диэн бэлиэтиибит.
Александр 6 кылаастан сэрии массыыналарын уонна тааҥкаларын сөбүлээн уруһуйдуур, интернет ситимиттэн интэриэһиргээн көрөр эбит. Сороҕор бэйэтэ айан уруһуйдуурун эттэ. Сашаны көрсөн, эбии ыйытыы биэрбиппэр маннык хоруйдаата: «Мин бу сайын Санкт-Петербург уонна Москва куораттарга баран кэллим. Москваҕа байыаннай мусуойдарга сылдьыбытым, онно Аҕа дойду сэриитигэр туттуллубут тааҥкалар бааллара. Мин санаабар саамай үчүгэй КВ-1, тоҕо диэтэххэ, саамай күүстээх уонна бөҕө. Бэйэм «Бронетанковое сооружение России» дакылааппынан кэмпириэнсийэлэргэ кыттыбытым, миэстэлэспитим, грамоталардаахпын».
