Сэтинньи 29 күнүгэр Саха сиригэр физкултуура хамсааһын 100 сыла туоларынан Мэҥэ Хаҥаласка физкултуура уонна успуорт сайдыытыгар тус кылааттарын киллэрсибит ытыктабыллаах бэтэрээннэрбитин, киэн туттар бастыҥ спортсменнарбытын бэлиэтиир тэрээһин ыытылынна.
Р.Г.Васильев аатынан улуустааҕы кыраайы үөрэтэр түмэлгэ Иннокентий Тихонович Васильев аатынан Успуорт албан аатын түмэлин экспонаттарын, Дмитрий Сыромятников – Кэрэһиннээх успуорка аналлаах кэллиэксийэтин быыстапкатын көрдөрүүгэ туруордулар.
Бу күн «Учителя физической культуры Мегино-Кангаласского района» диэн ааттаммыт саҥа кинигэ сүрэхтэниитэ буолла. Тэрээһини И.М.Сосин аатынан улуустааҕы киин бибилэтиэкэ ааҕааччыны кытта үлэлиир отделын сэбиэдиссэйэ Аграфена Зыкова уонна СӨ физкултуураҕа уонна успуорка туйгуна, «Урожай» уопсастыба бэрэссэдээтэлэ Виталий Пестряков иилээн-саҕалаан ыыттылар.
Саҥа кинигэ «Сайдам» хампаанньаҕа 200 ахсаанынан бэчээттэнэн таҕыста. Кинигэҕэ араас кэмнэргэ үүнэр ыччат чэгиэн-чэбдик доруобуйатын, өй-санаа, билии-көрүү өттүнэн сайдыылаах буоларыгар туһуламмыт үлэни тэрийбит физкултуура учууталларын үлэлэрин туһунан баай, элбэх суруйуу түмүллэн киирбит. Саха сиригэр физкултуура уонна успуорт хамсааһына 100 сылыгар анаммыт кинигэни педагогическай үлэ бэтэрээнэ, Майатааҕы успуорт мусуойун үлэһитэ Анна Ивановна Петрова, успуорт бэтэрээнэ Михаил Андреевич Петров бэлэмнээн таһаардылар. Кинигэ ааҕааччы киэҥ эйгэтигэр ананар. Физкултуура учууталларын туһунан толору суруллубут, бастакы кинигэ бэчээттэнэн тахсыбытын тоһоҕолоон бэлиэтиибит.
Кинигэ ырытыытын И.М.Сосин аатынан улуустааҕы киин бибилэтиэкэ бибилэтиэкэрэ Марина Трифонова оҥордо. Кинигэ ааптара Анна Ивановна кэргэнинээн Михаил Андреевичтыын кинигэҕэ хайдах үлэлэспиттэрин сырдатта. СӨ физическэй култуураҕа үтүөлээх үлэһитэ Афанасий Илларионов «Физкултуура учууталлара Аҕа дойду Улуу сэриитигэр» диэн ааттаммыт түһүмэххэ эбии матырыйаал хомуллан ситэриллиэн наадатын ыйда. Маныаха атын биридимиэт учууталларыгар эмиэ сиэрийэ быһыытынан кинигэ тахсыан наадатын, үөрэх управлениетыгар үлэлэһэллэригэр этии киллэрдэ. Мэҥэ Хаҥалас улууһун Бочуоттаах олохтооҕо Дмитрий Васильевич Сыромятников — Кэрэһиннээх, «Урожай» физкултуура-успуорт уопсастыбатын 17 сыл салайбыт Анатолий Константинович Захаров, РФ физическэй култуураҕа үтүөлээх үлэһитэ, Аллараа Бэстээх 1 №-дээх оскуолатын физкултуураҕа учуутала Гаврил Семенович Попов кинигэ тула санааларын үллэһиннилэр. «Саха» НКИХ үлэһитэ Родион Юрьевич Кривогорницын успуорт бэтэрээннэригэр Эдуард Еремеевич Местниковка, Александр Михайлович Николаевка, Яков Алексеевич Яковлевка, Иван Николаевич Ходуловка, Василий Васильевич Борисовка саҥа тахсыбыт «История бокса Якутии 1956 — 2022» кинигэлэри бэлэх уунна.
Д.Ф.Ходулов аатынан култуура киинигэр араас сылларга улууспут аатын өрөспүүбүлүкэ, Арассыыйа уонна Аан дойду түһүлгэлэригэр үрдүктүк ааттаппыт успорт бэтэрээннэрин, салайааччылары, тириэньэрдэри үөрүүлээх быһыыга-майгыга чиэстээтилэр.
Муниципальнай оройуон баһылыга Дмитрий Тихонов, Саха Өрөспүүбүлүкэтин физическэй култуураҕа уонна успорка миниистирин бастакы солбуйааччы Александр Бугаев спортсменнарга эҕэрдэ, махтал истиҥ тылларын анаатылар. Бастыҥтан бастыҥ, улууска физическэй култуураны уонна успуорду сайыннарыыга, чөл олоҕу көҕүлээһиҥҥэ холобур буолар үлэни ыытан кэлбит ытыктыыр дьоммутугар өр сыллаах үтүө суобастаах үлэлэрин иһин наҕараадалары туттардылар.
