Олунньу 6 күнүгэр Балыктаахха кыргыттарга улуус иһинэн успуорт бэтэрээнэ, энтузиаст, чөл олох уонна успуорт бырапагандыыһа Гаврил Васильевич Прибылых аатынан волейболга сабыылаах күрэхтэһии буолан ааста.
Күрэхтэһиини Гаврил Васильевич чугас дьоно, Мэҥэ нэһилиэгин дьаһалтата, М.П.Габышев аатынан оскуола (дириэктэр Е.Н.Иванов) өйөбүлүнэн тэриллэн ыытылынна. Тэрээһин аһыллыытыгар олоҕун аргыһа, кэргэнэ Марина Семеновна кылгастык ахтыы оҥордо. Павловскай, Мэлдьэхси, Бүтэйдээх, Табаҕа, Чыамайыкы, Майа, Төҥүлү, Тумул, Хорообут, Балыктаах оскуолаларын спортсмен кыргыттара оонньооннор мустубут дьон ыһыытаан-хаһыытаан «ыалдьан» биһирээбиттэрин биллэрдилэр. Балайда уһун киирсии кэнниттэн үһүс миэстэни Төҥүлү оскуолатын хамаандата (тириэньэр Николай Заровняев), иккиһи Хорообут (тириэньэр Василий Прибылых ‒ Гаврил Васильевич кыра уола), бастакы миэстэни В.П.Ларионов аатынан Майа оскуолаларын хамаандалара (Артем Пестерев) ыллылар.
Кыайыыга дьулуурдаах «Бастыҥ оонньооччу» ааты Сандаара Тихонова, «Бастыҥ нападающий» ‒ Маша Шепелева (Төҥүлү), «Бастыҥ разыгрывающай» ‒ Сандаара Скрябина, «Бастыҥ көмүскээччи» ‒ Марианна Андреева (Хорообуттар) Гаврил Васильевич оҕолоро туруорбут бириистэрин туттулар. «Кэскиллээх оонньооччу» аат Дайаана Гаврильеваҕа ананна, киниэхэ бииргэ оттоспут-мастаспыт бырааттара бириистэрин туттардылар. Олохтоох дьаһалта бириистэрин Балыктаах оскуолатын кыргыттара Лилиана Трифонова, Сайнаара Стручкова, Сайнаара Харитонова, Бүтэйдээхтэн Доминика Рудых, Суолаттан Галя Романова, Павловскайтан Нарыйа Оллонова туттулар. «Бастыҥ тириэньэринэн» ааттанан Анна Бурнашева туруорбут бирииһин Майаттан Артем Пестерев ылла.
Балыктаахтар урукку сылларга волейболга наһаа хаалсыбат этибит, онон бу курдук оҕолортон саҕалаан сайыннарыаҕыҥ диэн олохтоохтор бэйэлэрин санааларын эттилэр. Күрэхтэһиини тэрийбит Гаврил Васильевич оҕолоро бу тэрээһинтэн астынан туран өйөбүл буолбут Мэҥэ нэһилиэгин дьаһалтатыгар, оскуола кэлэктиибигэр, аймахтарыгар Людмила, Мария, Дмитрий Захаровтарга, Анна Бурнашеваҕа, Лариса, Петр Кычкиннарга, табаарыстарыгар Эдуард, Анна Кычкиннарга, Илья, Александра Владимировтарга, Андрей, Любовь Винокуровтарга, Яков, Саргылаана Стручковтарга, Гаврил Васильевич үөрэппит оҕолоругар Ия Кычкинаҕа, Татьяна Цыденжаповаҕа, Евдокия Баишеваҕа, Маргарита Катакиноваҕа уонна бииргэ үөрэммит оҕолоругар барҕа махтал тылларын тиэртилэр. Салгыы өссө сайыннаран оҕолорбутугар, ыччакка волейболга интэриэс күүһүрдүн, үрдүк таһымҥа таҕыстын диэн баҕа санаалаахтар.
Мария Захарова.
