Ойуур баһаара
Күүтүүлээх сайыммыт өҥүрүк куйаас күннэрэ сатыылыыр кэмнэрэ үүннэ. Улууспут сиригэр-уотугар ардаҕа суох кураан күннэр тураллар. Сир-дойду куурбутун бары көрө-истэ сылдьабыт. Маннык курааҥҥа уоттан сэрэхтээх буоларбыт булгуччу ирдэниллэр. Хайыы үйэ улууспут сиригэр-уотугар 5 ойуур баһаара таҕыста.
Ааспыт нэдиэлэҕэ Хаҥалас улууһугар тахсыбыт ойуур баһаара тыал хайысхатынан биһиги Чыамайыкыбыт сиригэр-уотугар киирбитэ. Улахан иэни хаппыт баһаар икки улуус уонна Дьокуускайтан ойуур баһаары утары сулууспалар көмөлөрүнэн хас да хонук иһинэн бохсуллубута.
Мэҥэ Хаҥаластааҕы ойуур хаһаайыстыбатын лесничэйэ Алексей Тимофеев иһитиинэрбитинэн, ааспыт нэдиэлэҕэ, бэс ыйын 8 күнүгэр, Хаптаҕай нэһилиэгэр сыбаалка умайан ол уота салгыы уота ойуурга тахсан баһаар тахсыбыт. Быйыл аҥаардас сыбаалкаттан умайыылар Майаҕа, Сыымахха, Нөөрүктээйигэ уонна Хаптаҕайга уопсайа 4 нэһилиэккэ бэлиэтэммиттэр. Бу түбэлтэлэр сыбаалканы көрөр-истэр киһи суоҕуттан тахсыбыттарын Алексей Петрович бэлиэтиир.
Кини куйаас күннэргэ этиҥ түһүүтүттэн, чаҕылхантан сылтаан баһаар ойуурга уот турар түбэлтэлэрэ хаһан баҕарар тахсыахтарын сөбүн онуоха нэһилиэк баһылыктарыттан баһаары бохсууга тиэхиньикэлэр, биригээдэлэр мэлдьи бэлэм буолаллара ирдэниллэрин тоһоҕолоон бэлиэтиир. Ойуур баһаарын утары үлэҕэ-хамнаска хас биирдии нэһилиэгинэн былаан ылыныллар. Онно төһө, туох тиэхиньикэ туһаныллыахтааҕа барыта ыйыллар. Ол эрэн сорох ардыгар ол былааҥҥа киирбит тиэхиньикэ бэйэтэ, сэбэ-сэбиргэлэ ыксаллаах кэмҥэ туһаныллар кыахтааҕар болҕомто ууруллубата баар чахчы. Онон нэһилиэк баһылыктара итиниэхэ ураты болҕомтолорун уураллара ирдэниллэр.
Улууспут олохтоохторо, ханна да сырыттарбыт, ойуурга уоттан сэрэхтээх буолуоҕуҥ! Күөх ойуурбутун уоттан харыстыаҕыҥ!
Бэйэбит кэр.