Майаҕа Мария Лукина салайар “Түмэн” уопсастыбаннай холбоһук 1993 сылтан тэриллэн үлэлиир. Холбоһукка билигин 39 түмсүү биир сомоҕо буолан, сэлиэнньэ, улуус, өрөспүүбүлүкэ ыытар үлэлэригэр кыттыһан, уопсастыбаннаһы көҕүлээн кэллилэр.
Түмсүүлэр бу сыллааҕы үлэлэрин сэтинньи 18 күнүгэр “Дьол түһүлгэтэ” уопсастыбаннай кииҥҥэ Майа сэлиэнньэтин баһылыгар Алексей Неустроевка отчуоттаатылар. Баһылык бэйэтин өттүттэн сэлиэнньэҕэ ыытылла турар үлэлэри сырдатта. Улуустааҕы Ытык сүбэ бэрэссэдээтэлэ Зиновий Игнатьев, улуустааҕы бэтэрээн сэбиэтин салайааччы Евдокия Решетникова кыттыыны ылан санааларын үллэһиннилэр.
Мария Лукина бу күн “Түмэн” састаабыгар саҥа уопсастыбанньыктар эбиллибиттэрин билиһиннэрдэ: Федор Баишев, Михаил Егоров холбоһук сүбэтин чилиэннэринэн, Инна Николаева “Кийииттэр” түмсүүнү иилээн-саҕалаан үлэлэтиэхтэрэ.
Бэтэрээн сэбиэтин аатыттан бэрэссэдээтэли солбуйааччы Елена Захарова, элбэх норуот маастардара иитиллэн тахсыбыт, “Сүрэхтэн сүрэххэ” бырайыагы төрүттэспит Үһүс көлүөнэ оскуола салайааччыта Людмила Заровняева-Стручкова, араас таһымнаах куонкурустар кыайыылаахтара “ОБТ” бальнай үҥкүү түмсүүтүн, “Блиндажнай чүмэчи”, “Сылаас суорҕан” аахсыйалар салайааччылара Людмила Пивоварова, “Түһүлгэ”, “Айыллыат” фольклор түмсүүлэрин сэргэ, анал байыаннай дьайыы кыттыылаахтарыгар саһыарар сиэккэ оҥоруутун салайар Евдокия Семенова, “Ай-Талаан” түмсүүнү сэргэ анал байыаннай дьайыы кыттыылаахтарыгар иистэнэр сыах салайааччыта Федора Наумова, “Детсад бэтэрээннэрэ”, анал байыаннай дьайыы кыттыылаахтарыгар харысхал оҥорор түмсүүлэри салайар Татьяна Попова, Саха итэҕэлин тарҕатааччы, уһуйаан, оскуола оҕолорун сиэргэ-туомҥа уһуйар, алгысчыт, “Сырдык Айыы сыдьаайа” түмсүү салайааччыта Анна Климентова, ону сэргэ, “Алгыс” түмсүү салайааччыта Екатерина Мосоркина, “Райпо бэтэрээннэрэ” түмсүү салайааччыта Анна Павлова, “Хаалыктаах хаамыы”, “Көмүс кэм” түмсүүлэри салайааччы Ариадна Филиппова, дьахтар кэмитиэтин салайааччы Екатерина Романова, “Оһуохай” түмсүү салайааччыта Людмила Неустроева, кэллиэксийэньиэрдэр түмсүүлэрин салайааччы Нина Никанорова, өр сыл улуус бэтэрээннэрин сэбиэтин салайбыт, “Култуура бэтэрээннэрэ” түмсүү салайааччыта Маргарита Максимова, “Түмэн” докумуоннарын оҥорор, граннары суруйар Екатерина Баишева, “Эркээйи” волонтердарын салайааччы Марелла Баишева, о.д.а. киэҥ хабааннаах үлэлэрин сырдаттылар.
Баһылык Алексей Иннокентьевич отчуоту астына истэн Мария Дмитриевнаҕа махтанна итиэннэ уопсастыбаннай түмсүүлэр инникитин даҕаны биир сомоҕо буолан тахсыылаахтык үлэлииллэригэр эрэнэрин эттэ.
Марелла Баишева.
