Кулун тутар 5 күнүгэр Аллараа Бэстээххэ «Уопсай уонна эбии үөрэхтээһиҥҥэ сыыппара эйгэтэ» өрөспүүбүлүкэтээҕи пуорум буолан ааста.
Быйыл үһүс төгүлүн ыытыллар пуорум Аллараа Бэстээх бөһүөлэгэр арыллыбыт «IT-cube» саҥа дьиэтигэр саҕаланна. Мэҥэ Хаҥаластан, чугас уонна ыраах улуустартан, Дьокуускай, Ньурба куораттан оскуола, учууталлара, эбии үөрэхтээһин киинин, «IT-cube» педагогтара, ыҥырыылаах ыалдьыттар 150-тан тахса буолан кытыннылар. Тэрээһин сыала уопуту атастаһыы, саҥа методикалары көрдөөһүн, саҥаны оҥорон таһаарыы буолла.
Түмсүү сүрүн тэрийээччитэ ‒ СӨ Саҥа технологияларга институтун кэлэктиибэ. Пуорум ыҥырыылаах ыалдьыттарынан Томскайдааҕы политехническэй университет информационнай технологияҕа кафедратын доцена, техническай наука хандьыдаата Оксана Замятина, Смоленскай куорат «IT-cube» киинин эбии үөрэхтээһинин педагога Владислав Ковалев маастар кылаастары ыыппыттара улахан сэҥээриини ылла. Куораттар уонна улууспут «IT-cube» киинин педагогтара сыыппара эйгэтигэр аналлаах араас тиэмэлэргэ маастар кылаастары, идэ таһымын үрдэтэр куурустары ыыттылар. Пуорум иһинэн идэ таһымын үрдэтэр кууруһу Оксана Замятина “Саҥа кэм салайааччыта” тиэмэҕэ кэпсээбитэ улахан сэҥээриини ылла.
Иван Лукин.
