Сахаларга кэлэр 2025 сыл Иэйэхсит сыла. Бу үүнэр сыл биһиэхэ үтүөнү түстүүр. Билиҥҥи уустук кэмнэри кэннигэр хаалларан ил-эйэ олохтоннун, бары дьиэ кэргэн сылаас холумтанын аттыгар буоллун, үөрүүлээх күммүт үксээтин диэн Үрдүк Айыыларбытыттан көрдөһүөҕүҥ.
Дойду көмүскэлигэр сылдьар анал байыаннай дьайыы кыттыылаахтарыгар, биир дойдулаахтарбытыгар анаан Майатааҕы “Түмэн” уопсастыбаннай холбоһук бары хайысханан киэҥник үлэлиир. Байыастарга көмөлөһөр сыаллаах араас аахсыйалар ыытыллаллар.
Ол чэрчитинэн, Майатааҕы “Түмэн” уопсастыбаннай холбоһук бу дьыл ахсынньы 18 күнүгэр киэһэ 17 чаастан “Дьол түһүлгэтэ” уопсастыбаннай кииҥҥэ Саҥа дьылы көрсө “Ассорти” сүүйүүлээх лотерея оонньотор. Лотереяттан киирбит үп анал байыаннай дьайыы кыттыылаахтарыгар барар.
500 солкуобайга билиэти атыылаһан, сыаналаах бириистэри сүүйүөххэ сөп. Сүрүн бириис – убаһа аҥаара. Ону таһынан тыа хаһаайыстыбатын аһа-үөлэ, дьиэҕэ-уокка туттуллар тиэхиньикэ, норуот маастардарын оҥоһуктара, о.д.а. сыаналаах бириистэр оонньонуохтара.
Билиэттэр “Дьол түһүлгэтэ” уопсастыбаннай кииҥҥэ уонна биирдиилээн уопсастыбанньыктарынан атыыланыахтара.
Лотереяттан киирбит үп биир дойдулаахтарбытыгар күүстэригэр күүс эптин, кыайыы-хотуу үктэллээх төрөөбүт төрүт сирдэригэр чөл туруктаах эргиллэн кэлэллэригэр төһүү күүһүнэн буоллун.
Марелла Баишева.