Өрөспүүбүлүкэ үрдүнэн саахар диабетын сэрэтэр үлэ нэдиэлэтэ биллэриллибитэ. Бу үлэни Мэҥэ Ханаласка улуустааҕы поликлиника эндокринологияҕа кэбиниэтин үлэһиттэрэ сүрүннээн тэрийдилэр.
Аллараа Бэстээх бөһүөлэгэр эндокринолог быраас Сардана Михайлова сэтинньи 13 күнүгэр учуокка турар дьону амбулаторияҕа ыҥыран барыларын көрөн баран, саахар диабетыттан хайдах харыстанар туһунан сиһилии билиһиннэрбитэ (диабет оскуолатын ыыппыта). Онно доруобуйаларын көрдөрүнэ кэлбит дьоҥҥо анаан саахары хайдах хонтуруоллуур наадатын уонна күннээҕи ас хайдах буолуохтааҕын туһунан кэпсээбитэ.
Майаҕа эндокринолог сиэстирэтэ Дария Брызгалова «Мэҥэ-тутуу» тэрилтэ үлэһиттэригэр, «Кэрэл», «Аверс», «Максим», «Дархан» эргиэн дьиэлэрин атыыһыттарыгар уонна баҕалаах дьоҥҥо хаан глюкозатын кээмэйдиир экспресс-тест оҥордо, ыарахан ыарыыттан хайдах харыстанар туһунан билиһиннэрдэ.
Нэдиэлэ иитинэн уопсайынан 87 киhи доруобуйатын туругун көрдөрдө, ол иһиттэн 2 киһи эндокринолог кэбиниэтигэр иккистээн бэрэбиэркэҕэ ыҥырылынна.
Ыарыыны сэрэтии үлэтин сүрүннүүр быраас Ирина Маркова:
— Сылтан сыл саахар диабетынан ыалдьар киһи ахсаана элбээн иһэр. Хомойуох иһин, аҕам саастаах дьоҥҥо эрэ буолбакка, ыччаттарга уонна оҕолорго бу ыарахан диагноз үрдүүрэ баар суол. Биһиги саахар диабетыттан харыстанарга үөрэтэбит (диабет оскуолата) диэн сырдатыахпытын баҕарабыт. Бу туһунан улуустааҕы поликлиникаҕа кэлэн эндокринолог сиэстэрэтигэр билсиҥ.
Улууспут олохтоохторун хас сыл аайы ыытыллар диспансеризацияҕа кэлэргитигэр ыҥырабыт. Эрдэттэн ыарыыны сэрэтэр уонна чэгиэн буолар туһуттан тугу гынар наадатын быраастар сүбэлээн-амалаан биэрэллэр. Чэгиэн-чэбдик буолун!», – диэн биһиэхэ иһитиннэрдэ.
