Майа сэлиэнньэтигэр Д.Ф.Ходулов аатынан култуура киинигэр Мэҥэ Хаҥаластааҕы дьиэ кэргэн уонна ыччат социальнай-психологическай өйөбүлүн киинэ 20 сыллаах үбүлүөйүн бэлиэтээтэ. Үөрүүлээх тэрээһиҥҥэ улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, СӨ психологическай киинин дириэктэрэ Владимир Скрябин, өрөспүүбүлүкэтээҕи уйулҕа киинин төрүттэспит Октябрина Туприна, нэһилиэктэр баһылыктара, тустаах салалталар салайааччылара, бэрэстэбиитэллэрэ кыттыыны ыллылар.
Билиҥҥи уустук кэмҥэ нэһилиэнньэ уйулҕа үөрэхтээҕин өйөбүлүгэр наадыйыыта улаатта. Ол инниттэн көдьүүстээх, утумнаах үлэ ыытылларыгар “Кылаабынай муниципальнай психолог” өрөспүүбүлүкэтээҕи бырайыакка бииргэ үлэлиир туһунан сөбүлэҥҥэ улуус баһылыгын социальнай уонна имиджевэй бэлиитикэҕэ солбуйааччы Альбина Григорьева уонна СӨ психологическай киинин дириэктэрэ Владимир Скрябин илии баттаһан, улууспутугар үлэтин саҕалыыр бэлиэ түгэнин бигэргэттилэр.
Өрөспүүбүлүкэтээҕи уйулҕа киинэ дойдубутугар дьон-сэргэ олоҕор көмө, өйөбүл буолар сүрүн соруктаах 2000 сылтан үлэтин саҕалаабыта. Биһиги улууска биир бастакынан 20 сыл анараа өттүгэр салаа арыллан, күн бүгүҥҥэ диэри нэһилиэнньэҕэ тирэх буолар үлэтин хас да хайысханан сайыннаран таһаарыылаахтык үлэлиир-хамсыыр.
Дьон-сэргэ олоҕо туруктаах буолуутугар үтүө суобастаахтык, бэриниилээхтик үлэлии-хамсыы сылдьар дьоммут үөрүүлээх быһыыга наҕараадалары туттулар. Ол курдук, улуустааҕы киин бастакы салайааччыта, билигин улуус дьаһалтатын эппиэкэ уонна харалта салаатын салайааччыта Галина Попова «СӨ психологическай сулууспатын туйгуна» түөскэ кэтиллэр бэлиэнэн, киин арыллыытыгар улахан кылааттаах, улуустааҕы бэтэрээннэр сэбиэттэрин бэрэссэдээтэлэ Евдокия Решетникова СӨ Бырабыыталыстыбатын бэрэссэдээтэлин солбуйааччы Ольга Балабкина илии баттааһыннаах Махтал суругунан наҕараадаланнылар. Ону тэҥэ ыкса үлэлэһэр тэрилтэлэр салайааччылара, эппиэттээх исписэлиистэр бочуоттаах грамотаны, махтал суруктары үөрүүлээх быһыыга туттулар.
Киһи уйулҕатын, ис туругун, майгытын-сигилитин, санаатын-оноотун кэтээн көрөр, үөрэтэр, көмө буолар олус уустук, олус эппиэтинэстээх уонна интэриэһинэй идэни талан үлэлии-хамсыы сылдьар дьоммутугар — Валерия Дмитриева салайааччылаах кэлэктиипкэ итии-истиҥ эҕэрдэ буолуохтун. Дойдубут чэчирии сайдарыгар, дьоммут-сэргэбит олоҕо тупсарыгар төһүү күүс буолаҥҥыт, сарсыҥҥы күҥҥэ эрэллээхтик хардыылыылларыгар кыһамньылаах үлэҕитигэр үрдүк ситиһиилэри баҕарабыт.
Улуус дьаһалтатын пресс-сулууспата.
Иван Лукин хаартыскаҕа түһэриитэ.
