Бүгүн Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Бычков улууспут баһылыгар Дмитрий Тихоновка үс саҥа ПАЗ оптуобус күлүүһүн туттарда. Дойдубут Бэрэсэдьиэнэ Владимир Путин сорудаҕынан, Ил Дархаммыт Айсен Николаев өйөбүлүнэн Дьокуускай куорат Комсомольскай болуоссатыгар 12 улууска саҥа оптуобустар үөрүүлээх быһыыга—майгыга бэрилиннилэр.
Оптуобустары туттарыы үөрүүлээх чааһыгар 12 улуус баһылыгыттан талан икки киһиэхэ тыл биэрдилэр. Горнай улууһун баһылыга Никита Андреев нууччалыы, Дмитрий Тихонов Мэҥэ Хаҥалас улууһун туруу үлэһит дьонун аатыттан уу сахалыы тылынан эҕэрдэ уонна махтал тылларын эттэ.
Оптуобустары Егор Трифонов салайааччыллаах «Техкоммунсервис» тэрилтэ үлэлэтиэҕэ. Тэрилтэ бастыҥ үлэһиттэригэр Николай Дьяконовка, Николай Старостиҥҥа, Ян Петровка саҥа оптуобустары туттардылар.
Дьокуускайтан Майаҕа диэри маҥнайгы пассажирдарынан улууспут эдэр ыччаттара буоллулар. Саҥа оптуобус сымнаҕас айанын, сылаас олбоҕун, тупсаҕай оҥоһуутун хайгыы көрдүлэр. Биир оптуобуска 20 буолан айанныахха сөп. Аны мантан ыла оптуобуһунан эрэ сылдьыам диэччилэр кытта бааллар.
Саҥа тимир көлөлөр бөҕө туруктаах буоллуннар, улууспут дьонугар-сэргэтигэр өр сулууспалаатыннар.
Көнө суолу, күөх уоту баҕарабыт!
Елизавета Неустроева
