Бэлиэ күн
Бүгүн, олунньу 10 күнүгэр, төрөөбүт-үөскээбит улууспут төрүттэммитэ 95 сылын туолла. Бу кэрэ-бэлиэ күҥҥэ анаммыт үөрүүлээх тэрээһин Майаҕа Д.Ф.Ходулов аатынан норуот айымньытын дьиэтигэр үрдүк таһымҥа бэлиэтэннэ. Манна күндү ыалдьыттарынан ыраахтан-чугастан ыҥырыллан Мэҥэ Хаҥалас сайдыытыгар тус кылааттарын киллэрсэн араас сылларга оройуоҥҥа, өрөспүүбүлүкэҕэ үрдүкү салалтаҕа, эппиэттээх дуоһунастарга үлэлээбит, биллэр-көстөр ытык-мааны дьоннорбут буоллулар. Кинилэр ортолоругар бааллар ‒ Люлия Григорьева, Матвей Мучин, Евдокия Колосова, Иван Корякин, Василий Игнатьев, Аркадий Алексеев, Юрий Попов, Андрей Находкин, Юрий Баишев, Юрий Куприянов, Гаврил Слободчиков, Захар Никитин, Кирилл Гаврильев, Николай Цыпандин о.д.а.
Мустубут дьону дьоро-бэлиэ күнүнэн улуус баһылыга Дмитрий Тихонов, оройуон Сэбиэтин бэрэссэдээтэлэ Иннокентий Андросов, Ил Түмэн дьокутаата Андрей Находкин, «Саха сирин тимир суоллара» аахсыйалаах хампаанньата» АУо генеральнай дириэктэрин солбуйааччыта Алексей Местников, улуус кылаабынай бырааһа Иннокентий Павлов эҕэрдэлээтилэр, наҕараадалары туттардылар.
Өр сыллаах таһаарыылаах, үтүө суобастаах үлэлэринэн өрөспүүбүлүкэ судаарыстыбаннай наҕараадаларынан бэлиэтэннилэр: «Гражданскай килбиэн» анал бэлиэнэн 2012‒2025 сс. Ороссолуода нэһилиэгин баһылыгынан үлэлээбит Илья Макаров, «СӨ үөрэҕириитин үтүөлээх үлэһитэ» бочуоттаах аатынан И.Г.Игнатьев аатынан Хара успуорт лиссиэйин дириэктэри үөрэтэр-иитэр үлэҕэ солбуйааччы Анна Антонова, «СӨ норуотун хаһыыйыстыбатын үтүөлээх үлэһитэ» бочуоттаах аатынан РФ Ис дьыалаҕа, СӨ дьарыктаах буолууга туйгуна, Ходоро нэһилиэгин баһылыгынан өр сылларга үлэлээбит Алексей Васильев, «СӨ култууратын үтүөлээх үлэһитэ» бочуоттаах аатынан саха эстрадатын артыыһа, урбаанньыт, СӨ култууратын туйгуна Иннокентий Гаврильев-Лэкиэс, «СӨ үтүөлээх бэтэринээр бырааһа» бочуоттаах аатынан 1-кы Баатаратааҕы бэтэринээр учаастагын сэбиэдиссэйэ Иннокентий Санников, Ил Дархан Грамотатынан олох-дьаһах хомунаалынай хаһаайыстыбатын Бэдьимэтээҕи учаастагын маастара, СӨ тыатын хаһаайыстыбатын туйгуна Владимир Сергучев.
Мэҥэ Хаҥалас улууһун Бочуоттаах гражданинын үрдүк аатын сүкпүт тутааччы Алексей Захаровка, СӨ култууратын уонна ускуустубатын бочуоттаах үлэһитэ Юрий Куприяновка, РСФСР норуотун үөрэҕириитин туйгунугар, СӨ үөрэҕириитин үтүөлээх үлэһитигэр Павел Морохоевка, СӨ норуотун уус-уран айымньытын сайдыытыгар кылаатын иһин бэлиэлээх Руслан Мохначевскайга, СӨ үөрэҕириитин, профессиональнай үөрэхтээһинин туйгунугар Галина Поповаҕа-Санаайаҕа, улууска успуорт уонна ыччат бэлиитикэтин сайдыытыгар кылаатын иһин бэлиэлээх Николай Свинобоевка, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ Тамара Сергучеваҕа дастабырыанньалар, түөскэ кэтиллэр бэлиэлэр туттарылыннылар.
«Мэҥэ Аат» Бочуот кинигэтигэр Дьабыылтан Роман Баишев, Хаптаҕайтан Екатерина Гаврильева, Холгуматтан Иван Иванов, Тараҕайтан Николай Иванов, 1-кы Наахараттан Валерий Кириллин, Нөөрүктээйиттэн Михаил Назаров, 2-с Наахараттан Николай Никитин, Ходороттон Иван Осипов, Төҥүлүттэн Мария Плотникова, Алтантан Ирина Попова, Мооруктан Гаврил Скрябин, Мэҥэттэн Маргарита Скрябина киллэриллибитэрин туоһулуур сибидиэтилистибэлэри туттулар.
Ил Түмэн Бочуотунай грамотатынан «М.Егоров» ХЭТ ыанньыксыта Мотрена Макарова, Ил Түмэн бэрэссэдээтэлин Махтал суругунан Майаттан «Теплоснаб» учаастагын өрөмүөннүүр силиэсэрэ Павел Жирков, «Хорообут» ХЭТ суоппара Павел Семенов, педагогическай үлэ бэтэрээнэ Екатерина Сидорова наҕараадаланнылар.
Үөрүүлээх тэрээһиҥҥэ үтүө үгэскэ кубулуйан сыл түмүгүнэн таһаарыллар муниципальнай оройуон олохтоох бэйэни салайыныыларын икки ардыларыгар ыытыллар күөн күрэскэ социальнай-экэнэмиичэскэй көрдөрүүлэр түмүктэринэн үс бөлөҕүнэн бириистээх миэстэлэри ылбыт тыа сирин түөлбэлэрин дьаһалталарыгар Туоһу суруктар итиэннэ биирдиилээн хайысхаларынан «Бэйэ эйгэтигэр бастыҥ» анал ааттар, туттарылыннылар.
Улууспут төрүттэммитэ 95 сыллаах үбүлүөйэ Арассыыйаҕа Аҕа дойдуну, Саха сиригэр Ийэ дойдуну көмүскээччилэр, Аҕа дойду Улуу сэриитигэр Улуу Кыайыы 80, Манчаары Баһылай төрөөбүтэ 220, оройуоҥҥа доруобуйа харыстабыла тэриллибитэ 125, улууспутугар Тыа хаһаайыстыбатын сылларыгар бэлиэтэнэринэн ураты суолталаах. Быйылгы сылтан саҕалаан улууспут үйэлээх үбүлүөйүн чиэстээхтик көрсүүгэ сыал-сорук торумнанан бэлэмнэнии үлэтэ-хамнаһа саҕаланна.
Алена ДОКТОРОВА.
