Тохсунньу 19 күнүгэр Майаҕа Д.Ф.Ходулов аатынан норуот айымньытын дьиэтигэр 2023 сыл түмүгүнэн Мэҥэ Хаҥалас улууһун спортсменнарын, лауреаттарын чиэстээтилэр.
Тэрээһин Саха сиригэр физкултуура хамсааһын 100 сылыгар анаммыт, биир дойдулаахпыт, биллэр суруналыыс Родион Кривогорницын оҥорбут документальнай киинэ-хрониканы көрдөрүүттэн саҕаланна. Ол кэннэ ааспыт сыл бэлиэ түгэннэриттэн улууспут спортсменнарын ситиһиилэрин көрдөрөр ролик көрдөрүлүннэ.
Улуус баһылыга Дмитрий Тихонов бэлиэ күнүнэн успуорт бэтэрээннэрин, спортивнай уопсастыбаннаһы, спортсменнары эҕэрдэлээн туран, улуустарын чиэһин элбэхтэ көмүскээбит, араас күрэхтэһиилэргэ улууспут аатын албан ааттаппыт ытыктабыллаах бэтэрээннэргэ анал бэлиэлэри, наҕараадалары туттарда. Бу күн успуорт бастыҥ спортсменнара, лауреаттара чиэстэннилэр. Дьокуускайтан биир дойдулаахтарбыт Николай Цыпандин, Ил Түмэн дьокутаата Андрей Находкин кыттыыны ылан эҕэрдэлээтилэр. Саха эстрадатын ырыаһыттара Иннокентий Лебедев, Олимпия, Аскалон Павлов, Хараттан Николай Васильев-Айтамыл, Ороссолуодаттан Роман Иванов кэрэ ырыаларынан дьоро киэһэни киэргэттилэр.
Иван Лукин
