Чурапчы улууһугар алтынньы 27-28 күннэригэр ыытыллыбыт Педагог уонна уһуйааччы, Саха Өрөспүүбүлүкэтигэр физкултуура хамсааһынын 100 сылларыгар аналлаах Илин эҥэрдээҕи үөрэҕирии тэрилтэлэрин салайааччыларын XXXVII ыспартакыйаадатыгар Мэҥэ Хаҥалас улууһун хамаандата 1-кы миэстэҕэ тахсан, кыайыы өрөгөйүн биллэ.
Хамаанда састаабыгар Мэҥэ Хаҥалас үөрэҕириитин управлениетын начаалынньыга Гаврил Толстяков, начаалынньыгы солбуйааччылар Ирина Плотникова, Андрей Захаров, оскуола дириэктэрдэрин ситимин салайааччы Милан Илларионов, үөрэх үлэһиттэрин идэлээх сойууһун территориятааҕы кэмитиэтин бэрэссэдээтэлэ Иннокентий Скрябин уо.д.а., уопсайа 27 үөрэх тэрилтэлэрин салайааччылара кыттыыны ыллылар,
чаҕылхай кыайыылары аҕаллылар. Икки күн устата 9 көрүҥҥэ: остуол тиэнниһигэр, буулдьанан, оҕунан ытыыга, волейболга, ханаат тардыһыытыгар, саахымакка, дуобакка, дартска, хабылыкка, хаамыскаҕа илин-кэлин түһүстүлэр.
Ыспартакыйаада түмүгүнэн Мэҥэ Хаҥалас хамаандата бастаата, 2-с миэстэ Чурапчы, 3-с – Уус Алдан буоллулар. Амма, Таатта улуустарын хамаандалара 4-с уонна 5-с миэстэҕэ тигистилэр.
Онон Мэҥэ Хаҥалас улууһун үөрэҕириитин тэрилтэлэрин салайааччылара атырдьах ыйыгар ыытыллыбыт үөрэҕирии үлэһиттэрин өрөспүүбүлүкэтээҕи ыспартакыйаадатыгар бастаабыттарын бигэргэттилэр.
Дьоһун кыайыынан биир дойдулаахтарбытын эҕэрдэлиибит! 
