Улуус баһылыгын отчуотун Бырамаҕа биһирээтилэр

Бүгүн, ахсынньы 10 күнүгэр Мэҥэ Хаҥалас улууһун баһылыга Дмитрий Тихонов 2024 сыллааҕы үлэтин отчуота Холгума нэһилиэгэр сарсыарда 9 чаастан  саҕаланна.

Манна Ил  Түмэн дьокутаата, сир    сыһыаннаһыыларыгар, айылҕа харыстабылыгар уонна экологияҕа сис кэмитиэт бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, тыа хаһаайыстыбатын управлениетын салайааччы Иннокентий Семенов, улуус кылаабынай  бырааһа Иннокентий Павлов, үөрэх управлениетын начаалынньыгын солбуйааччы Михаил Петров, баһылыгы тутууга солбуйааччы Василий Филиппов, социальнай  көмүскэллээх буолуу кэлим киинин эппиэттээх үлэһитэ Петр Неустроев, улуус дьокутаата Александр Слепцов, о.д.а., ону тэҥэ, олохтоох нэһилиэк баһылыга Гаврил Ефимов,  дьокутааттара, уопсастыбаннаһа кыттыыны ыллылар. Дмитрий Тихонов быйылгы отчуотун слайданан көрдөрөн, салааларынан быһаара-быһаара кэпсээн, ааспыт сыллартан уратытык ыытта.

Кини улуус үрдүнэн бары хайысханан туох үлэ барбытын, үлэлии турар бырагыраамалары, ханна ситиһии, ханна хаалыы баалларын сиһилии сырдатта, нэһилиэккэ кииннэммит хочуолунай  тутуутугар үлэ барарын эттэ.

Норуот дьокутаата Андрей Находкин билигин үгүс дьону долгутар Кликра сокуонун туһунан нэһилиэнньэҕэ быһааран улаханнык долгуйар наадата суоҕун өйдөттө.

Олохтоохтортон үлэ бэтэрээннэрэ мунаарар боппуруостарын ыйыттылар. Михаил Гаврильев оптуобус сырыытын сураста, анал байыаннай дьайыыттан кэлэр уолаттары сылаастык көрсөллөрүгэр махтанна. Альбина Захарова Кликра боппуруоһун быһааралларыгар көрдөстө, 40-чэ сыл ыстаастаах култуура бэтэрээнэ  Устинья Тарабукина М.К.Попова аатынан саҥа кулууп тутуутун туруоруста. Оскуола дириэктэрэ Николай Петров оскуола фасадын өрөмүөнүн, успуорт саалатын ититиини көтөхтө. Ыччат Дмитрий Иванов эдэр исписэлиистэргэ уопсай дьиэ наадатын эттэ. Туһааннаах салайааччылар ыйытыыларга хоруйдаатылар.

Отчуоту олохтоох дьон, чаас төһө да эрдэтин иһин, дьиэтээҕи түбүктэрин үмүрүтэ охсон кэлэн, 47 киһи иһиттэ итиэннэ сэргэх, үчүгэй отчуот буолла диэн махтанан тарҕастылар. Улуус баһылыгын бүгүҥҥү отчуота эрдэ саҕаламмыт биричиинэтинэн мантан салгыы икки нэһилиэккэ отчуоттаан баран, биир дойдулаахпыт, Сэбиэскэй Сойуус Дьоруойа Федор Кузьмич Поповка аналлаах пааматынньык боппуруоһунан Дьокуускайга кини аатынан уулуссаҕа туруорулларын быһаарсар 17 чаастан буолар мунньахха салайааччыларбыт баттаһа тиийиэхтээхтэр. Кинилэргэ ситиһиини баҕарабыт.

 

Марелла Баишева.