Улуус баһылыгын отчуота – Төҥүлү нэһилиэгэр

Ахсынньы 20 күнүгэр улуус баһылыгын 2024 сыллааҕы үлэтин отчуота Төҥүлү нэһилиэгэр ыытылынна.

Отчуотуур бөлөххө СӨ Ил Түмэн Судаарыстыбаннай Мунньах сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, улуус управлениеларын, тэрилтэлэрин салайааччылара кыттыыны ыллылар.

«Эйгэ» култуура киинигэр оскуола үөрэнээччилэриттэн саҕалаан аҕам саастааҕар тиийэ 162 буолан мустубуттар. Дмитрий Тихонов быйыл улууска бары хайысхаларынан ыытыллыбыт үлэни сиһилии билиһиннэрдэ. Отчуоттуур мунньаҕы нэһилиэк баһылыга Петр Эверстов арыйан, дьонун-сэргэтин көхтөөхтүк кыттарга ыҥырда.

Төҥүлү олохтоохторо сылын ахсын туруорсар этиилэрин – саҥа култуура дьиэтин, успуорт саалатын, муусука оскуолатын тутууну туруорустулар уонна эбии оскуолаҕа өрөмүөн үлэтэ салҕанара, нэһилиэккэ киирэр суолга анал бэлиэ, оптуобус сылдьара наадатын эттилэр.

Саҥа хотон туттарга туох көмө көрүллэрин, үүт-эт туттарар сыанатын, Аллараа Бэстээххэ элбэх оҕолоох ыалларга бэриллибит учаастакка туох үлэтэ барар турарын, өрүһү туоруурга салгын олбохтоох суудуналары ылыыга үлэ ханна тиийбитин, о.д.а. ыйыталастылар.

Улуус бары дьонун долгутар «КлиКра сокуонун» туһунан Андрей Находкин сиһилии быһаарыытынан мунньах түмүктэннэ.

 

Иван Лукин.