Ахсынньы 18 күнүгэр күн иккис аҥаарыгар улуус баһылыгын отчуота Мөҥүрүөн нэһилиэгэр буолла. Я.П.Кычкин аатынан элбэх хайысхалаах култуура киинигэр отчуокка 72 олохтоох кэллэ. Дмитрий Тихонов 2024 сылга ыытыллыбыт үлэни сиһилии билиһиннэрдэ, ситиһиилэри, туолбут сыаллары кэпсээтэ.
Отчуоттуур мунньаҕы нэһилиэк баһылыга Юрий Александров арыйда, нэһилиэк олохтоохторун көхтөөх кыттыыны ылалларыгар ыҥырда.
Олохтоохтор эбэлэрин уутун быраҕарга ньыма, электроуот остуолбалара уларыйар туруктаахтарын, Маттаҕа бэтэринээр суоҕун, бөх иһин төлөбүр хонтуруолланара, нэһилиэк «Ыраас уу» бырайыакка киирэрэ наадатын эттилэр.
«Юпитер» тэрилтэ хочуолунайа салгыы үлэтин, нэһилиэккэ хаһан гаас кэлиэҕин, хаһаайыстыба тэринэргэ көмө, үүт-эт туттарарга уларыйыы, хайдах оттуур сири ылар, итии ситимигэр холбонорго уонна сылаас иһин төлөбүргэ көмө, социальнай хантыраагы хайдах ылыахха сөбүн, оҕо уһуйаанын өрөмүөннүүр бырайыак хамсааһынын, Аллараа Бэстээххэ элбэх оҕолоох ыалларга бэриллибит учаастактарга гаас, электроуот киирэрин, “Уһук Илин гектар” көмөтүнэн сир ылыытын, Чыамайыкыга алмаас хостооһунун туһунан, о.д.а. элбэх ыйытыылар киирдилэр.
Улуус дьокутааттарын сэбиэтин бэрэссэдээтэлэ Иннокентий Андросов тыа хаһаайыстыбатын сайыннарыыга бэйэтин көрүүлэрин билиһиннэрдэ.
СӨ Ил Түмэн Судаарыстыбаннай Мунньах сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ Андрей Находкин улуус бары дьонун долгутар «КлиКра сокуонун» туһунан сиһилии кэпсээтэ.
Иван Лукин.
