Ахсынньы 25 күнүгэр улуус баһылыгын Дмитрий Тихонов 2024 сыллааҕы үлэтин отчуотун түмүктүүр тэрээһинэ Хорообут нэһилиэгэттэн саҕаланна.
Отчуоттуур бөлөххө СӨ Ил Түмэн Судаарыстыбаннай Мунньах сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ Андрей Находкин, улуус управлениеларын, тэрилтэлэрин салайааччылара кыттыыны ыллылар.
Нэһилиэк култууратын киинигэр отчуоту истэ 81 олохтоох муһунна. Дмитрий Тихонов 2024 сылга улууска бары хайысхаҕа барбыт үлэни сиһилии билиһиннэрбитин кэннэ нэһилиэк баһылыга Гаврил Бродников дьонун-сэргэтин көхтөөх кэпсээтигэ ыҥырда.
Хорообут олохтоохторо сүрүннээн нэһилиэккэ быраас, оптуобус сырыыта, улууска невролог, нэһилиэктэр икки ардыларынааҕы суоллары тупсарар наадатын эттилэр.
Нэһилиэккэ хаһан гаас ситимэ кэлэрин, үүт иһин төлөбүрү, ынах иитэр дьоҥҥо өйөбүлү, Аллараа Бэстээххэ элбэх оҕолоохторго бэриллибит учаастакка туох үлэ бара турарын, улууска учуутал тиийбэт туруктан тахсар туох ньыма баарын туһунан ыйыталастылар.
Үгүс дьону долгутар «КлиКра сокуонун» Андрей Находкин быһааран биэрдэ.
Хорообут нэһилиэгин олохтоохторо анал байыаннай дьайыыга сылдьар дьоҥҥо күүс-көмө буолалларыгар Дмитрий Тихонов махтанна.
Иван Лукин.
