Ахсынньы 23 күнүгэр Мэҥэ Хаҥалас улууһун баһылыгын сыллата ыытыллар үгэскэ кубулуйбут 2024 сыллааҕы үлэтин отчуота Нөөрүктээйи нэһилиэгин кэнниттэн салгыы Дьаҥхаады нэһилиэгэр буолла.
Манна Ил Түмэн дьокутаата Андрей Находкин, улуус сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар. Отчуот мунньаҕын нэһилиэк баһылыга Василий Стручков иилээн ыытта. Кини нэһилиэгин олохтоохторун тирээн турар кыһалҕалаах боппуруостарын кэлбит салайааччылартан ыйытан, мунньахха көхтөөхтүк кытталларыгар ыҥырда.
Улуус баһылыга Дмитрий Тихонов норуоппут баай култууратын тарҕатар талба талааннаах дьоммутун өйөөн, СӨ норуотун маастара Анисия Федорова-Аан Иис Ийэҕэ уонна СӨ уус-уран оҥоһуктарын маастарыгар Дария Ноговицынаҕа харчынан Туоһу суруктары үөрүүлээхтик туттарда. Бу кэннэ баһылык Ил Дархан этиитинэн ылыныллыбыт сокуонунан тыа хаһаайыстыбатын боломуочуйалара кэҥээн биэрбиттэрин иһитиннэрдэ, кэлиҥҥи 3 сылы тэҥнии тутан 2024 с. ыытыллыбыт үлэ-хамнас сүрүн көрдөрүүлэрин отчуотун слайданан көрдөрөн, сиһилии быһааран сырдатта.
Ытык сүбэ чилиэнэ, бэтэрээн сэбиэтин салайааччы Иван Ермолаев нэһилиэк ыччата успуорка ситиһиилээхтик кытталларын бэлиэтээн туран, бастыҥ спортсменнары иитэн таһаарарга лааҕырга сөптөөх усулуобуйа тэриллэригэр баҕатын, арыылар ууга барар буоланнар кумаҕынан бүрүллэн, оттуур сир иэнэ кыараан иһэрин, онно таастары тиэйэн кытылга бөҕөргөтүү үлэтин оҥорор наадатын эттэ. Олохтоохтор оскуола интэринээтигэр кэлэр сылга өрөмүөн үлэтэ барара наадатын, учууталларга уоппуска кэмигэр айаҥҥа туһаммыт билиэттэрин төлөбүрүн, уһуйаан төлөбүрэ тоҕо үрдээбитин, улууска атын дойдулартан кэлэн үлэлиир үлэһиттэр санитарнай көрүүнү барыыларын, уот остоолболорун, боробуоттарын уларытыы үлэтин, “Уйгу” түөлбэ “Уу ылар сирэ” диэҥҥэ киирэн тутуу барара көҥүллэммэт буолбутун, манна дьону олохсутарга тутуу барарыгар инникитин туох үлэ барыан сөбүн, гаас ситимэ хаһан кэлэрин, култуура киинин тутуута ханнык бырагыраамаҕа киирэрий, тутуллара наадатын, хотон тутуута бырайыакка киириэ дуо, хотону туттарга улуус өттүттэн өйөбүл наадатын, нэһилиэккэ оптуобус наадатын, о.д.а. ыйыттылар, этиилэрин киллэрдилэр.
Олохтоохтортон киирбит ыйытыктарга туһааннаах салайааччылар толору хоруйдары биэрдилэр.
Норуот дьокутаата Андрей Находкин олохтоох бэйэни салайыныыга икки таһымнаах ситимтэн биир таһымнаах көрүҥҥэ киириэхтээх барыбытын долгутар “КлиКра сокуонун” барылын туһунан бэйэтин санаатын дьонугар-сэргэтигэр тиэртэ.
Түмүккэ Дмитрий Иванович нэһилиэк олохтоохторугар анал байыаннай дьайыыга сылдьар уолаттарга барар көмөҕө көхтөөхтүк кыттыыларын иһин махтанна.
Отчуоту 92 киһи кэлэн иһиттэ.
Марелла Баишева.
