Улуус баһылыгын отчуота – Дьабыыл нэһилиэгэр

Ахсынньы 20 күнүгэр улуус баһылыга Дмитрий Тихонов 2024 сыллааҕы үлэтин отчуота Дьабыыл нэһилиэгиттэн саҕаланна.

Отчуотуур бөлөххө улуус управлениеларын, тэрилтэлэрин салайааччылара, солбуйааччылара, исписэлиистэрэ кыттыыны ыллылар.

Дмитрий Иванович 2024 сыл устата ыытыллыбыт үлэлэри билиһиннэрбитин кэннэ нэһилиэк баһылыга Дмитрий Петров дьонун-сэргэтин көхтөөх кэпсэтиигэ ыҥырда.

Олохтоохтор нэһилиэк электроуотун күүһүрдүү, федеральнай трассаҕа сүөһүттэн, сылгыттан сэрэхтээх буолуу туһунан бэлиэлэри туруоруу, оптуобустар сырыыларын, скважина оҥорон нэһилиэги ыраас уунан хааччыйыы, култуура дьиэтин өрөмүөнүгэр улуустан көмө, кэпэрэтиип сайылыктарыгар электроуоту тардыы, МТС төлөпүөн сибээһэ наадатын эттилэр.

Бу кэннэ нэһилиэккэ хаһан гаас кэлэрин, 50 сыл бииргэ олорбуттарга туох өйөбүл көрүллэрин, улууска диализ кэбиниэтэ арылларын, Аллараа Бэстээххэ элбэх оҕолоох ыалларга бэриллибит сирдэргэ туох үлэ бара турарын, тыа хаһаайыстыбатын үлэһиттэригэр туох көмө, үүт-эт туттарыллар сыанатын туһунан ыйыттылар.

Бу күн отчуоттуур мунньахха Саха АССР үтүөллэх артыыһын К.Д.Борисов аатынан «Түһүлгэ» элбэх хайысхалаах култуура киинигэр 54 олохтоох кыттыына ылла.

 

Иван Лукин.