Ахсынньы 23 күнүнээҕи Мэҥэ Хаҥалас улууһун баһылыгын сыллата ыытыллар үгэскэ кубулуйбут 2024 сыллааҕы үлэтин отчуота Нөөрүктээйи, Дьаҥхаады нэһилиэктэрин кэнниттэн 3-с Мэлдьэхси нэһилиэгинэн түмүктэннэ. Манна Ил Түмэн дьокутаата Андрей Находкин, улуус сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар. Отчуот мунньаҕын нэһилиэк баһылыга Мирон Свинобоев иилээн ыытта.
Улуус баһылыга Дмитрий Тихонов кэлиҥҥи 3 сылы тэҥнии тутан 2024 с. ыытыллыбыт үлэ-хамнас сүрүн көрдөрүүлэрин отчуотун слайданан көрдөрөн, сиһилии быһааран сырдатта.
Ол кэннэ олохтоохтортон Петр Тихонов, Давил Гаврильев, Валерий Никифоров, о.д.а. Аллараа Бэстээххэ үлэлиир омуктар улууска нолуок төлүүллэр дуо, өрүһүнэн айанныырга ирбис төлөбүрэ улаханын, манна улуус өттүттэн туох оҥоһулларын, сылгы төбөтүгэр бэриллэр көмө туһунан, “КлиКра сокуонун” быһааран биэрэллэригэр, судмедэкспертиза тоҕо холодильнига суоҕун, анал байыаннай дьайыы кыттыылаахтарыгар сир боппуруоһун быһаарыыга туох үлэ барарын, улууска төһө грант бэриллибитин, суол реконструкцията тоҕо барбатын, тыа хаһаайыстыбатын салаатыгар тус сыаллаах үөрэнэр устудьуон баар дуо, Дьокуускай куоракка барбыт улуус сирэ төннүө дуо, сүөһү аһылыгын бэлэмниир бырагыраама туһунан, о.д.а. ыйытыктар киирдилэр. 2025 с. 50 сылын туолар оҕо уһуйааныгар үбүлүөйү көрсө өрөмүөн үлэтин, сири оҥоруу үлэтигэр аналлаах тиэхиньикэ наадатын, Ростелеком үлэтэ мөлтөөбүтүн, сылгы хаһаайыстыбаларыгар тэҥ көмө оҥоһуллуон, ыччаты тыа сиригэр олохсутарга, оҕону кыра сааһыттан үлэҕэ иитэргэ бу көдьүүстээх буолуоҕар, о.д.а. санааларын үллэһиннилэр.
“Томтор” ХЭТ бэрэссэдээтэлэ Дмитрий Жирков билигин 2 хотон үлэлии турарын, үһүс хотон тутуллара наада буолбутун, сайылыкка уот лииньийэтэ тардыллара, саҥа титиик оҥоһуллара наадатын эттэ.
Тыа хаһаайыстыбатын исписэлииһэ, 20-тэн тахса сыл ыарахан туруктаах оҕолору кытта үлэлээбит, муус аннынан балыктааһыҥҥа сынньалаҥ базатын тэрийбит, бааһынай хаһаайыстыба тэриммитэ 10 сыла буолбут Валерий Никифоров хаһаайыстыбатын салгыы сайыннарарга уонна соҕуруу куораттарга сылдьан ылбыт уопутун тарҕатарга өйөбүлгэ наадыйарын эттэ. Кини улуус баһылыгын отчуотун үчүгэйинэн сыаналаата уонна маны оскуола оҕолоругар көрдөрөн-иһитиннэрэн, улууска туох үлэ барарын билэн, дойдуларыгар бэриниилээх ыччаты үүннэрэргэ төһүү күүс буолуоҕун ыйда.
Улуус Ытык сүбэтин чилиэнэ, үлэ бэтэрээнэ Федот Богимов Бүлүүгэ барбытынан туруорсар боппуруостарын үс балаһаҕа суругунан хаалларбыт. Манна хас да бэйэтин санаатын, ол иһигэр, улууска бэриллэр боломуочуйалар сорох чааһын нэһилиэк дьаһалталарыгар биэриэххэ диэбит. Нэһилиэк баһылыга Мирон Анатольевич суругу толору ааҕан иһитиннэрдэ уонна нэһилиэк дьоно туруорсар боппуруостарын түмэн улуус баһылыгар туттарда.
Ил Түмэн дьокутаата Андрей Находкин дойдубутугар киириэхтээх олохтоох бэйэни салайыныыга туһуламмыт барыбытын долгутар “КлиКра сокуонун” барылын туһунан бэйэтин санаатын дьонугар-сэргэтигэр тиэртэ.
Түмүккэ Дмитрий Тихонов нэһилиэк олохтоохторун саҥа киирээри турар сокуону бэлэмнээх көрсөргө, нэһилиэнньэ ахсаана эбиллэригэр туһаайар сөптөөх үлэлэри ыытарга, долгутар ыйытыктарынан уонна этиилэринэн кыттыбыттарыгар итиэннэ анал байыаннай дьайыыга сылдьар уолаттарга барар көмөнү өйөөн туох кыалларынан көхтөөхтүк көмөлөспүттэрин иһин махтанна. Баһылык ил-эйэ олохтоннун, уолаттарбыт этэҥҥэ дойдуларыгар эргиллэн кэллиннэр, куруутун түмсүүлээх, кыайыылаах-хотуулаах буолуоҕуҥ диэн баҕа санаатын тиэртэ.
Отчуоту 92 киһи кэлэн иһиттэ. Бу киэһээ 2 аҥаар чаас устата олорон икки өттүттэн киэҥ кэпсэтии буолан нэһилиэнньэ астынан тарҕаста.
Марелла Баишева.
