Быйыл ураты суолталаах Улуу Кыайыы 80, өрөспүүбүлүкэҕэ Аҕа дойду көмүскэлин, Майаҕа Төрүччү сылларыгар аналлаах Майатааҕы «Кэнчээри» уһуйааҥҥа «Улуу Кыайыыны уһансыбыт киэн туттар өбүгэм» дакылаат куонкуруһа ыытылынна.
Улахан уонна бэлэмнэнии бөлөхтөртөн 14 оҕо төрөппүтүн кытта кытыннылар, төрүччүнү үөрэтии-чинчийии үлэтигэр бастакы хардыыларын оҥорбуттарын сыанабылга таһаардылар. Дакылаат кыттыылаахтара Улуу Кыайыыны уһансыбыт, эйэлээх олоҕу аҕалсыбыт хос эһэлэрин, тыылга үлэлээбит, оҕо саас диэни билбэтэх хос эбэлэрин туһунан сүрдээх иһирэхтик, киэн тутта кэпсээтилэр. Лилиана Романова ийэтинээн Изабелла Яковлевналыын ийэ, аҕа ууһун икки өттүттэн киэҥник сырдаппыттара, Айтал уонна Айталы Дмитриевна Сутаковтар, Алгыстаан уонна Айталина Юрьевна Ильиннар дьиэ кэргэттэрэ сэриигэ сылдьыбыт хос эһээлэрин бойобуой наҕаарадаларын харааннаан илдьэ сылдьаллара долгутуулаах, кэрэхсэбиллээх. Слава Васильев ийэтинээн Яна Ариановналыын уон көлүөнэҕэ тиийэ төрүччүлэрин ылсан туран үөрэппиттэрэ хайҕаллаах.
Күрэскэ оҕо дьон иннигэр толлубакка, сахалыы сайаҕыстык саҥаран, ситимнээхтик кэпсииригэр болҕомто уурулунна. Алгыстаан Ильин, Айар Масаха, Айыына Старостина, Дархан Аммосов, Рома Толстоухов дьоһуннаахтык туттан өбүгэлэрин килбиэннээх олохторун туһунан кэпсээтилэр. Күрэскэ кыттыбыттар бары да эгил-тэгил түсүһэн, үөрэтэр-чинчийэр үлэҕэ кыһаллыбыттарын көрдөрдүлэр, дьиэ кэргэн үтүө үгэстэрин, удьуор үлэһиттэрин билиһиннэрдилэр. Хас биирдии ыал хантан хааннааҕын, кимтэн кииннээҕин, туспа устуоруйалааҕын кэнчээри ыччакка тиэрдэллэрэ олус суолталаах. Мантан саҕаланар дьиэ кэргэҥҥэ истиҥ сыһыан, ураты эйгэ, төрүттэринэн кытта быстыбат ситим, саха буолалларынан киэн туттуу.
Интэриэһинэй, дириҥ хорутуулаах үлэ ыытыллыбытын бэлиэтээбит дьүүллүүр сүбэ састаабыгар М.И.Брызгалова аатынан Майатааҕы оҕо бибилэтиэкэтин бэтэрээнэ Варвара Иванова, «Айар Майа» литературнай түмсүү чилиэнэ Капиталина Семенова, уһуйааммыт мэтэдьииһэ Мария Лепчикова үлэлээтилэр.
Түмүккэ сахалыы куттаах, сахалыы саҥаны өрө тутар, оҕо иитиитигэр холобур буолар дьиэ кэргэттэр маннык ааттарынан бэлиэтэннилэр. «Кылаан чыпчаал» кыайыылааҕынан Алгыстаан, Айталина Юрьевна Ильиннэр буолары ситистилэр.
«Бастыҥ төрүччүнү чинчийээччи» аатынан Лилиана, Изабелла Яковлевна Романовтар, Айыына, Юлия Ивановна Старостиннар, «Киэҥ билиилээх чинчийээччи» ‒ Айар, Александра Альбертовна Масаха, «Бастыҥ үтүө өйдөбүлү харааннааччы» ‒ Айтал, Айталы Дмитриевна Сутаковтар, «Бастыҥ утум ситимнээччи» ‒ Антон, Жанна Николавна Слепцовтар, Лилия Федорова эбэтинээн Ираида Ивановна Никаноровалыын, Дархан, Гульнара Фидаиловна Аммосовтар, «Сэргэх кэпсээнньит» ‒ Рома, Роман Михайлович Толстоуховтар, «Уран тыл» ‒ Степан, Валентина Петровна Стручковтар, «Кэскиллээх кыттааччы» ‒ Айкүн, Александра Альбертовна Масаха, Алиана Ядрихинская эбэтинээн Сардана Васильевна Охлопковалыын, «Кыайыыга дьулуур» ‒ Слава, Яна Ариановна Васильевтар, Эрсан, Туана Андреевна Махатыровтар бэлиэтэннилэр.
Сардана Алексеева, Мария Катаева,
Майатааҕы «Кэнчээри» оҕону сайыннарар киин.
