Тохсунньу 16 күнүгэр, Д.Ф.Ходулов аатынан култуура киинигэр Аҕа дойду сэриитигэр Улуу Кыайыы 80 сылын көрсө улуус бэтэрээннэрин сүбэтин «Улуу Кыайыы түмэр күүһэ» диэн ааттаммыт киэҥ ыҥырыылаах пленума ыытылынна.
Сүбэ мунньахха нэһилиэк баһылыктара, бэтэрээн сэбиэтин бэрэссэдээтэллэрэ, ыччат бэлиитикэтин исписэлиистэрэ, аҕам саастаахтар кыттыыны ыллылар. Мунньахтыыр чааска улуус баһылыга Дмитрий Тихонов, улуус бэтэрээннэрин сүбэтин бэрэссэдээтэлэ Евдокия Решетникова, тустаах тэрилтэ салайааччылара уонна Дьокуускай куораттан М.К.Аммосов аатынан Хотугулуу-Илиҥҥи федеральнай университет бэтэрээннэрин сэбиэтин бэрэссэдээтэлэ, өрөспүүбүлүкэтээҕи сэрии уонна үлэ бэтэрээннэрин сэбиэтин президиумун чилиэнэ Екатерина Никитина, СӨ Ис дьыала министиэристибэтин бэтэрээннэрин сэбиэтин бэрэссэдээтэлэ, өрөспүүбүлүкэтээҕи сэрии уонна үлэ бэтэрээннэрин сэбиэтин президиумун чилиэнэ Эдуард Федоров кыттыыны ыллылар.
Евдокия Решетникова быйылгы сылга Улуу Кыайыы 80 сылын көрсө ыытыллыахтаах үлэни сиһилии сырдатта, былааннары билиһиннэрдэ. Күн бүгүн улууска биир уоттаах сэрии кыттыылааҕа 100 сааһын ааспыт Дьокуускайга олорор Аҕа дойду улуу сэриитин бэтэрээнэ Березкин Алексей Николаевич олорор. Улууска уопсайа 476 сэрии сылын оҕото, 85 тыыл бэтэрээнэ уонна 7 огдообо баар. Бу ытык дьон ааттарын үйэтитиигэ, хас биирдиилэрин болҕомтоҕо ыларга үлэни ыытарга сүрүн сыал-сорук турарын бэлиэтээтэ. Сыл устата араас хайысхалаах бырайыактар үлэлиэхтэрин иһитиннэрдэ.
Майа сэлиэнньэтин баһылыга Алексей Неустроев, 2-ис Наахара нэһилиэгин бэтэрээннэрин сэбиэтин бэрэссэдээтэлэ Матрена Устинова, улуустааҕы үөрэҕирии салалтатын салайааччытын солбуйааччыта Михаил Петров, Майатааҕы үһүс көлүөнэ оскуолатын салайааччыта Людмила Заровняева-Стручкова, “Сэрии сылларын оҕолоро” улуустааҕы уопсастыбаннай түмсүү салайааччыта Анатолий Чичахов, улуус кылаабынай бырааһын солбуйааччыта Зинаида Андреева, култуураҕа уонна духуобунай сайдыыга салалта салайааччыта Анна Исакова, улуустааҕы «Ытык сүбэ” сэбиэтин салайааччыта Зиновий Игнатьев, социальнай бэлиитикэ салалтатын салайааччыта Октябрина Кулешова, нэһилиэнньэ социальнай көмүскэллээх буолуутун кэлим киинин салайааччыта Иван Шестаков, киликиэн улуустааҕы сулууспатын салаатын салайааччытын солбуйааччыта Лена Винокурова улууска итиэннэ өрөспүүбүлүкэҕэ Улуу Кыайыы 80 сылын көрсө ыытыллар үлэни сиһилии сырдаттылар итиэннэ салгыы ыытыллыахтаах үлэни торумнаатылар. Пленум түмүктүүр чааһыгар Евдокия Решетникова пленум быһаарыныытын иһитиннэрдэ, мунньах кыттыылаахтара биир санаанан сүнньүнэн ылыннылар.
2024 сыл түмүгүнэн улуус уон бастыҥ бэтэрээн спортсменнарын чиэстиир үөрүүлээх түгэнигэр сыл устата успуорт араас көрүҥнэригэр бастыҥ көрдөрүүлээх бэтэрээннэргэ улуус баһылыга Дмитрий Тихонов туоһу суруктары итиэннэ өйдөбүнньүк куубактары туттарда. Ону сэргэ, улууска бэтэрээннэр хамсааһыннарын тэрийиигэ көхтөөх үлэлэрин иһин, тус кылааттарын киллэрбит аҕам саастаахтарга махтал суруктары үөрүүлээх быһыыга туттарда.
СӨ Ис дьыалаҕа министиэристибэтин бэтэрээннэрин сэбиэтин бэрэссэдээтэлэ, өрөспүүбүлүкэтээҕи сэрии уонна үлэ бэтэрээннэрин сэбиэтин президиумун чилиэнэ Эдуард Федоровтан 2024 сыл түмүгүнэн улууска уонна өрөспүүбүлүкэҕэ бэтэрээннэр хамсааһыннарыгар көхтөөхтүк кыттыбыт дьон Сэрии уонна үлэ бэтэрээннэрин өрөспүүбүлүкэтээҕи сэбиэтин бочуоттах грамоталарын, махтал суруктарын туттулар.
Онтон “Сэрии сылларын оҕолоро” улуустааҕы уопсастыбаннай түмсүү салайааччыта Анатолий Чичахов бастыҥ үлэлээхтэргэ өрөспүүбүлүкэ бочуоттаах грамоталарын туттарда.
Зоя Герасимова.