Быйыл дойдубут Улуу Кыайыы 80 сыллаах үбүлүөйүн бэлиэтиир. Аҕа дойду сэриитин кэмигэр төрөөбүт дьонтон кыралара бу сылга 80-ын туолуохтара. Кыайыы сылыгар төрөөбүттэртэн Холгумаҕа улаханнык ытыктанар сэрии сылын оҕото Иванов Иван Константинович баар.
Иванов Иван Константинович 1935 с. сэтинньи 14 күнүгэр 1-кы Наахара нэһилиэгэр «Кыһыл Оборона» холкуоска холкуостаах дьиэ кэргэнигэр төрөөбүтэ. 1943 с. Тиэлиги начаалынай оскуолатыгар үөрэнэ киирэн баран, 1953 сыллаахха 2 Наахара 7 кылааһын бүтэрбит. Бэрт кыра сылдьан атын оҕолор курдук сут-кураан, сэрии сылларыгар улахан дьону кытта үлэҕэ-хамнаска тэҥҥэ эриллэн үлэлээн сылдьыбыт. 1953 с. холкуоскаүлэлээбит. 1956-1959 сс. Тиэлиги нэһилиэгэр үлэлээбитэ. Онтон бэттэх Бырамаҕа көһөн кэлэн олохсуйбута. Манна кэлэн да баран колхозка-совхозка араас үлэлэргэ үлэлээбитэ. Үс сыл оҕо звенотун салайбыта, онно сыллата үчүгэй көрдөрүүнү ситиһэн бастакылар кэккэлэригэр сылдьыбыта. Кэлин сылларга пенсияҕа тахсыар диэри тохтоло суох бостуугунан үлэлээн «Наахара» совхоз лауреата буолбута. 1941-1945 сс. Килбиэннээх үлэтин иһин И.В.Сталин мэтээлинэн, хас да үбүлүөйүнэй мэтээллэринэн наҕараадаламмыта. Иванов Иван Константинович тыыл, үлэ бэтэрээнэ, Мэҥэ аат бэлиэ хаһаайына, Холгума нэһилиэгин бочуоттаах олохтооҕо.
Олунньу 24 күнүгэр Холгума нэһилиэгин баһылыга Гаврил Ефимов, олохтоох дьаһалта исписэлииһэ Аянна Терентьева Майаҕа олорор ытык кырдьаҕаспытыгар Иван Константиновичка Улуу Кыайыы 80 сылыгар аналлаах үбүлүөйүнэй мэтээли туттардылар. Ытык кырдьаҕаспытыгар өссө да уһун сылларга чэгиэн туругу баҕарабыт.
Олохтоох бибилэтиэкэ үлэһитэ Попова Татьяна
